كل عام وأحنا تونس

كل عام وأحنا تونس 

كل عام وأحلى تونس

كل عام وتحيا تونس

عام لتالي ، كانت عندي حلمة .

أما عام لتالي ما كانش عندي الحق في كلمة .

عام لتالي مازوط وموتى .

وعام لتالي ما كنتش نعرف آش يسوى بنادم بلاش حريقة.

عام لتالي كذبة .

وعام لتالي حقيقة .

عام لتالي : بكل حزم ، نفسيتو هشة 

"qu'il crève "

"الكرتوش الحي ما عندوش مبرر"

الضمير الحي ما عندوش مبرر

youtube

ما نصليوش عالمنتحر

مفتي ووزراء وتجمع وليلى السراقة

عام التالي لا عورة ولا بول ناقة

عام لتالي نهبة وسرقة وفاقة

عام لتالي السافرة في وجه الحنوشة كرتوشة

عام لتالي المحامين

ساحة محمد علي

المدونين

والمواطنين

عام التالي رصاصة بن العينين

عام لتالي بونا الحنين

عام لتالي ثايرين.

عام لتالي موتى واحنا حيين .

عام ... زاد عام للامبدوزا

ناكتو البحورات ، بلعتو البطالة

يشلط وجه على دوزة

عام وفيسبا ، والفانتا مركوزة 

عيشة proxy ، وزطالة 

عام لتالي قلنا انيكو الحالة

عام عام ، وناك الحالة :

شهداء بالبالة

بو لحية من النوم طلب إقالة

على في السقالة

يبني في خلافة

سنين متلف الجرة

عايش فيلم الرسالة

من قتل ربه ؟

رجع يشبرش

والقناصة إشاعة

برى نعاودو للامبيدوزا بلاصة

عام عام ، والسبسي عطاه الفيزا

التجمع قلب الفيستا

تكبيييييييير

هاو التغيييييييير !

لا سيدي لا ربي

 النسمة ، حرية التعبير

البسوا نقاب ، لا نقولوا عليكم قحاب

أحزاب وحسابات

أفلام وإنتخابات

عام عام ، ورجع من لندرة

عام لتالي،  الفقر والميزرية لقدام

عام لتالي ، ومزالت سنين القدام

يكذب إلي يقول عييت

أنا اليوم بديت

وإنت ؟

عندك عام عالبنك

وناوي بالبلوتوث تمركي ؟

على شكون تمسكي ؟

عايش مستقنع متدفي

و تتباكى عالخلافة ؟

قوم اتكلم

من عام لتالي تعلم

إنت زادة كيفهم تفلم

عام لتالي ما كنتش تنجم حتى تتكلم

قوم ، ولا كمل كيفهم عوم

وكانك بالحق بتونس مغروم

يزي تشوكيع ، يزي تبعبيع

قطر تشري ، وبو لحية يبيع

وإنت بسكاتك باش تزيد تبيع

عام لتالي و عام مبعد سنين لقدام

وأحنا واقفين 

ما فماش حرة تولد من غيرة وجيعة

 

 

 

سجِّل! أنا جبري

سجِّل! أنا جبري

وأعملُ مع رفاقِ الكحط في مجلس
وأطفالي زبانية
أسلُّ لهمْ الملاوي،
والجلباب والدفترْ
من السلف
ولا أتوسَّلُ الصدقاتِ من بابِكْ
شهريتي 30 مليون
فهل تغضب؟

سجل
أنا طرطور
ولونُ الشعرِ..بالقشر مبشور ولونُ العينِ..
تحت نظاراتي لا أدري
وميزاتي:

على رأسي عقالٌ فوقَ كوفيّه
وعلى جبيني طابع التقوى
وعنواني:
أنا من قريةٍ عزلاءَ منسيّهْ
شوارعُها بلا أسماء
وكلُّ رجالها في قطر والمخفرْ

فهل تغضبْ؟

 

سجِّل
أنا دكتاتور
سلبت دماء شهدائي
وأرضاً كنتُ أهجرها
أنا وجميعُ أندادي
ولم أتركْ لها.. ولكلِّ أحفادها
سوى هذا الدستور

سجِّل.. برأسِ الصفحةِ الأولى
أنا
رئيس كرتون
عطاي وميبون
ولكنّي.. إذا ما جعتُ
آكلُ لحمَ خصيتي
حذارِ.. حذارِ.. من جوعي
ومن كحطي

 

 

قهرة محبوبة

تكلمت سعاد

ذبحت عصافر الجنّة 

ذنبهم الوقت إلي غدر

الصغر إلي تعدى مر

عرس بلا حنّة

حساباتك سعاد محسوبة

لعبة ضباع ولعبة ذيوبة

 تبكي المكبوبة 

تتخرخط في الدم

تبلع الغصة، تكوي بالهم

وغدوة نهارك إنت ندم

وشيرتك بالظلم مذهوبة

يا ويحك سعاد من قهرة محبوبة ...

يا ويحكم ملي تسب ونقم

عالحڨرة تفطم 

من الضحكة تحرم

كبر ،

في غبينتو غبر

حتى سمعك تعاير

قالوا تكلمت سعاد

جاك يجري في خاطر محبوبة غاير

يطير الطير وتقعد إنت في الندم محبوسة

يا ويحك سعاد من طول الليل الساير

يا ويحك من الطير الحاير

تفرفط العصافر وتسافر

تمسح الدم وتهاجر

و ترجع بالكلمة المفكوكة .

يا ويحو إلي سب 

إلي على عمرو تكب

و بلا سبب عاير

تجيه أيامات وتجيه أماير

و بعد ما يفوت الفوت يتفكر محبوبة ...

تكلمت سعاد

و تذبحت عصافر الجنّة 

لزرڨ وجيعة

لزرڨ تبلى ، صبعو جنّب طلعت فيه حكاية غريبة عملت الريحة ، كل ليلة والحكاية تكبر وكل ليلة الوجيعة تعطيه طريحة و لا خلاتو يرقد لا ليل و لا نهار ،أيا الكازي ولا رهن البورتابل متاعو وسرح للسبيطار ...

- "قداش عندو الانتفاخ هذا يا لزرڨ ؟

- "دكتور  ولله هو عندو مديدة أما أنا قعدت إنّسي وإنكذب . "

- "عندك وجايع أخرى في بلايص أخرى ؟ عندكش مرض مزمن ؟عندكمش شكون في العيلة كيفك ؟

- " النفخان وراثي عندنا في العيلة يا دكتور هههه ، أما الحالة هذي بصراحة ما ريتها عند حد "

- "باهي ، نقوموا بالتحليل اللازمة ، حاجة ما تخوفش والطب تقدم لازم نلقاوولها حل . قلي ، جيتنا صايم اليوم بش نعملوا التحاليل ؟ "

- "مالا نلعبو دكتور ، الصيام زادة وراثي في العيلة هههههه"

برا يا سيدي ، يا لزرڨ ايجا منا ، يا لزرڨ حل فمك ، يا لزرڨ مد صبعك، يا لزرڨ غطس صبعك في المادة هذي ، يا لزرڨ قيس السخانة ، يا لزرڨ قيس الدم ، يا لزرڨ قيس القلب ، يا لزرڨ أقعد استنى ، يا لزرڨ أرجع غدوة تحضر النتيجة ...

وكل نهار و لزرڨ راهن التليفون عند أولاد الحومة ، ماشي جاي يتوجّع يستنّى في النتيجة ، وصبعو ماشي ويزيد يتنفخ ولونو ما حبش يركح ، نهار أزرق نيلة ونهار عاطي بالقزوردي ، و لزرڨ يتقلّى يسب في الفرامليّة وفي أي واحد يعرضوا لابس طبليّة :" يعنبوكم وبو قرايتكم وبو الأمراض الوراثية ! " 

- " سي لزرڨ ما نكذبش عليك ، الحالة متاعك فردية من نوعها ، إجتمعنا فريق كامل من الاطباء وما فهمناش سبب هالداء ! "

- "إيه دكتور ، فماش دواء ؟ "

- " أكيد فما . لكن الوقت الحالي  يلزمك تقعد حذانا حتى نشوفو ..."

ولاّشي الكازي مبيّص في جرة صبعو ،ملوّح مفروش يعيط عالدواء والفراملية على قباحتو ما حبّوش  ، زاد ركبو الهلواس من السخانة تفكر أمو والحنانة  ، خنانتو تتقاطر ينوّح من الوجايع  " وينك يا بابا لحنين ؟ " ، ساعات يصكّو المريض إلي بجنبو ببردڨانة  وساعات يسخف عليه الطبيب يحللو التلفزة يتفرج على ماتش فماش ما ينسى الهدرة الأصلانية ...

حتى نهار ناداه راجل كبير توا سنين راقد في السبيطار في بيت وحدو  يقولولو الشريف صاحب الطابع  ، قلّو

- " يا أخ ، أعمل ربي في بالك وايجا حذا خوك نوسعلك بالك نقرالك الستين حزب ونرقيك وتو تشوف دواك عندي "

- " وكيف سيادتك وڨّاعة ، وترقي بالزبيبة وبالدلاّعة ، داويت روحك وخرجت سلامات وإنت كيف الفزّاعة نسمع بيك حتى ريتك   ! "

- " الله غالب ، هذا إختبار من عند ربي وأنا بالقدرة خارج عن قريب نستنى كيفك في الدواء الجديد قالوا إسمو الديمقراطية . وهاك نصيحة في الله : خوذ الدواء وقلهم بريت و ما عادش عندي وجيعة  أخرج قلهم الفزّاعة إشاعة ههههههه   . "

- " سامحني يا سي الشريف ، هاذيكا إلي قدامك تفاحة ؟"

- "إيه نعم  ، بقدرة الله تفاحة!"

- " وإلي جنبها ، بقدرة الله سكّينة ؟"  

- "إيه نعم ولدي ،سكّينة  "

ينڨّز لزرڨ يفك السكّينة ، وفي سهم تنفيسة يعطي لصبعو ضربة عريضه ، تتقاطر دموماتو على جبين الشيخ يقوم يكبّر ، يفزع السبيطار  ، ويصيح لزرڨ  :

"قصان الصوابع ولا قحب صاحب الطابع !"

وقعد لزرڨ أيامات بلاش وجيعة ، حتى نهار يعرضو في الشارع الشيخ صاحب الطابع ، غزرلو وضحك ، عيّطلو  لزرڨ ونطق :

" يعنبوكم وبو الديمقراطية !" 

دكتاتورية الجوع

بكينا
و رقصوا
لأن البكاء لا يليق
بمن بطونهم خواء
و بقينا
على شفة الطريق
بلا لحية
بلا رداء
وهم كانوا
ولازالوا
بلا غذاء
لا يرقص الجائع
لوعود الماء...
وهم تجار الغباء .
سنسهر
لينهض لنا
من جسد القتيل
زهر وسكر
سنسكر
وغداً
بعضنا يبقى
و بعضنا ينام
لا يفيق
وكلنا سواء
...

أعتقني

ظلم الزين نطّقني ،  الدم إلي ساح تحت الساقين نطّقني ، العلم إلي نحيتوه وعلقتو في بلاصتو السواد نطّقني ، النشيد إلي حرّفتوه وقلتو حرام  نطّقني ، باش تجي إنت اليوم بإسم الدين تنحر العباد ، تحرق الأكباد و تخلي البلاد رماد  تسكّتني ؟  عِفْني ، أعتقني !

أحنا الضحكة والمشموم تحت الشاشية ، أحنا الحرية ، أحنا الثنية .  أحنا النشيد ، أحنا امالي البلاد ، أحنا الستيلو والقلم ، أحنا الفن ، أحنا العِلم ، أحنا الألوان أحنا الحياة ، ما عادش يسكَّتنا ضالم  وتهزنا الأوهام ، ثنيتنا نور  وثنيتهم ضلام  . أحنا الأحمر دم ، النجمة معنقة الهلال ، محبة الأوطان حلال ،  محبة الغير حلال ،  أحنا البلاد ، أحنا الأعلام !  ما تخليوش تجار الديانة يهزوكم للظلال  !

إحترام الغير ، مرا راجل أستاذ معلم طبيب بطال مرماجي فلاح ...كبير وصغير ، مسلم  مسيحي يهودي ملحد ، على خاطرو كيفك وكيفك تونسي ، هي  القداسة .  ديني في قلبي ما حاجتي بدروس من عند البهناسة ، يعملو بإسم الدين في السياسة ، ولد بلادو ما يسوى صوردي قدام البياسة ،  حط فوق راسو طاسة وعلى جبينو  حياصة ، في دنيتك وراك  جهنم ، يفتي على قلبك وعلى آخرتك ،  وردّك نجاسة  ، يستخايل بالكحولية باش يمركي في الجنة بلاصة !

دين التبوريب والفصاصة مهوش دين : وينهم من إحترام المرأة والجار والوالدين ؟  ما عملناش ثورة باش أختي وأختك تولي عورة ، نلبسوها نقاب وكان قالت لا نقولوا قحاب . تونس بلاد الخير عمرها ما يغرد فيها غراب  . 

أعتقني ، أملصني، في حريتي و في أفكاري ما تساومني . دينك فلوس ، حديث كهوفات ماكلو السوس ، وديني حرّية .

تحيا تونس حمراء حيّة !

لا لديكتاتورية الخوانجية !!! 

إنت الصوت

إنت الصوت ، إنت الديون ،إنت المغبون، إنت راس القصبة

إنت الحوت ، إكتب وأرمي في البحر ،

  إنت  حر،  إنتحر

إنت المربوط ، عام قفة وفيسبا ، إنت الزهر لا ، إنت العتبة

إنت إلي فاتتك بعد الفرصة ألف فرصة ، هاربة بيك فرسة

إنت السوسة وهوما الزرصة ، إنت الغصرة

إنت النطرة ، إنت النحرة ، إنت الحافي فوق الجمرة

إنت الظلمة ، عطاتك بظهرها الشمس ، ونسِاتِّك القمرة 

إنت الصوت ، إنت المتراك ، إنت الحرقة ، إنت الفلقة

إنت الفُرقة ، إنت الغرقة

إنت إلي تموت في آخر حلقة

إنت الصوت إنت الجواجي إنت الحريقة

إنت الحقيقة

وهوما الغناية ..

إنت الصوت  

إنت إلي رماتك الدنيا الكلبة للشطوط 

 وهو البلوط ،هو البلعوط ...

إنت الصوت

وهو إلي يتكلِّم ؟

إنت إلي تتألِّم ،

وهو إلي يفلِّم ؟

إنت الدرابو

وهو الميكرو

إنت القحبة

وهو الماكرو

إنت الصوت ، فاتك الفوت

عيشة بخوت

و عمر مكبوت

إنت الوجيعة

إنت الفن

وهو العفن

إي نعم ، إنت الصوت

عمرك ما تموت ...

دستوري هو تونس

تونس دولة تونسية : لغتها التونسي ، و علمها تونسي ونشيدها تونسي و غرامها تونسي ، حلالها وحرامها تونسي ، مشمومها تونسي و مشومها تونسي ، قحبها تونسي و فنها تونسي وعفنها تونسي وكفنها تونسي : إلي يتولد فيها تونسي ولي يتدفن فيها تونسي ولي موش عاجبو : يدّو !

 

Ferjani Monia   

و لباسها تونسي و حكمها تونسي و تاريخها تونسي

 و شرابها تونسي

 

• Chut Libre

    والسلتية الحنينة والماڨون الحڨار، توفى الكمية ندوروها للبار نطيحو بالاحباب المقعار والطفار واللي في رمضان فطار واللي معلق سبحة في فم الدار ،  

  وسلاطتها تونسية و حلوتها فليّو وكارها ديمة روتار و سراقها كثار و طحانتها عملوا العار : تونسي ديمة صار ما صار !
• Ferjani Monia 

  و جاري الذي ينسنس عليّ و زميلي الّي عالغلطة يستنّى فيّ و جزّار الحومة الّي يغشّ فيّ و عرفي الّي ديما يخرنن عليّ ... و قدّ ما تعمل فيّ تونس نحبّها هي هي

   
  
  

  Ferjani Monia
  

  و البريكة تونسيّة ، و البرّاق يرتّل في القرآن قبل شقّان الفطر تونسي ، و قصع الكسكسي في سيدي محرز تونسيّة ، و الغلفة بالفليّو و " الطبيب آش يفهم منّه" تونسيّة ، و " زميل تيكة" تونسيّة ،و "ديقاج" تونسيّة ،و الغنا الملتزم في الجامعة تونسي ، و الوصيف بيّاع التكوة في بياصة باب سويقة تونسي ، و عشويّات الصفصاف تونسيّة ، و الخسارة في الكورة تونسيّة ،و الفطاير تونسيّة، و الجبّة تونسيّة ، و الشاشيّة تونسيّة، و قفص الكانالو تونسي ،
• 
  

  Chut Libre 

  واللبن إلي شطرو ماء تونسي ، والبقلاوة بالكاكوية تونسية ، وميات غرام قلوب فوقها شنغوما كلوروفيل ، و المدب متع الكتاب البدوفيل ، وفي البلفيدير تحجير الفيل ، والشرش شلوق براني في النشرة الجوية ، و الركشة قدام الماتش والجمعية ، والحضرة والمزاودية ، و لافونو في لاعياد تولي ديوان ورڨلية ، والعودة المدرسية وفي الليل ألف مرة نقيسو الطبلية ، وسبادري غزالة هههه وفنتازيا والروبافيكية : وهرة ربّانية ! وكيف يلعب المنتخب السلتية والنشوة التاريخية ....آه ، وريحة الملوخية والطابونة واللبلابي يبات الليل يشوي فيا .......
  

  
  
• Chut Libre وحماة الحمى معششة فيك وفيا ، في الغربة من المطار تبدى ساقي تاكل فيا ، مكفن البنادق والمارس لاجار لا في الديوانة يفيقوا بيا ، بعد ما عالفيزا عملوا فيا: ينحيولنا كل شي ، وكل شي يتبدل وتقعد الجنسية : تونسية 
  

  Ferjani Monia 

  و بوك كي يضربك و من بعد يقلّك إيجا تعشّى ، و الضحك الّي يشدّك كي واحد يطيح قدّامك ، و الفوسكة تونسيّة ، و الدوران في الحياصة تونسي ، و صبّان الماء في النهج باش العزيز يرجع تونسي ، و طاجين الملسوقة بونارين تونسي ، و المشلوش في ليالي الشتاء الباردة تونسي ، و ربع الكابوسان الّي نتقاسموه تونسي ، و جمع سيدي بلحن تونسيّة ، و القصّان على البرامج التلفزيّة كي يقولو لك " نكتفي بهذا القدر" تونسي ، و قصّان الضو على غفلة تونسي ، و قشور الدلاع في البحر تونسيّة ، و الغشّ تونسي و الغشّة تونسيّة ، الكلمة القبيحة تونسيّة ، و الدمعة السخونة لأقلّ حاجة زادة تونسيّة ، تونس في قلبي و في عينيّ كي ما تصلّيش موش معناها قاوريّة والا يهوديّة ، تونس ياسمينة بلديّة و قناويّة مرساويّة و وشمة بربريّة

  
  

  Chut Libre 

  ولميمة بعد طريحة نباش القبور تغلفك بالفيكس والزهر تونسية ، و مهبة العيد والتصاور والبامبلوني ، ومماتي ما أحلى ريحتها معترقة بلكولونيا تونسية ، والقلة في الطهورات ، والقلة في اللمة في الزنازات ، وللامة في المنامات ، والعروي والحكايات ، والركشة مع البنيات في البالاصات ، ولبخورات وركيض الغشاشر في الفروحات ، و-"يزي عيب عواشر " ، وربي كان موش في السبان راهو في دعاء الخير حاضر ، ويكب سعدك بعدها يعيش ولدي ، و مهبول الحومة المرزي ، والقحاب والصوحاب والاصحاب والعركة موش على سيغارو أما على عقاب ..... موش متاعنا النقاب ، متاعنا الحايك والفوطة والسفساري ، تريكو فضيلة وترتيل الأنداري ... تونسي أنا متع راي أونو و فرانس دو وجغام في الوطنية ونجيب الخطاب وقداش كانت مكرزة السهرية ، تونسي أنا موش متع إقرأ و الكحولية ، تونسي أنا متع الرشة زهر ونسري في القهيوة العربي ، وفي روارية الجنسية : تونسية !

  

!!! عزيز عمامي و يدهم

 

معشّشة فيك الوطاية ، بن علي خلاّلك وصاية : رد بالك تولّي راجل  !  رد بالك تولّي إنسان !

هازز فرد وعزيز عمامي دهشرك بكعبة بنان ! يا بوليس يا جبان  ، راك في الانحطاط باش فنّان !  البارح في الأيام ، خارج تتباكى مُخنان ، ساق لتالي وساق القدام ، تعمل في الأفلام ، من أول الدنيا عارفينك رهدان  :  كيف سيدك قلت "غلطوني" ، مش كيف تولّيو بكلكم طرهوني ، المخيّر فيكم ڨرادة ؛ هز متراك كلاشنيكوف ولا بوسعادة ، و كيف الصيد يزيدوا يعلقولك ڨلادة ، تقعد طول عمرك قرد مصنان ، قوّاد أسيادك ، كيف سيدي كيف جواده ! !

يا مسخرة ، يا إلّي كنتو للدكتاتورية مفخرة : اضرب ، فلّق، بالمتراك  كسّر   ، عالإنحطاط زيد كمّل عبّر ، عزيز كيف كل رجال  تونس ونساها ، بكلمة وحدة يجيبك تتدهشر !  الشيطان منك يستغفر !

فيق يا عون يا ضابط يا رفيق ، فيق يا مدير : يا حسرة على زمان التغيير ، تضرب عزيز ينبتلك ألف عزيز ، أحنا اليوم  نقرروا المصير !

عزيز  .......

 التونسي عزيز وغالي ، موش كيف قرد جغّالي يجبد عليه متراك ولا فصّالي !  يا بوليس يا بوهالي ، قرد وبرشة فيك ، عشرة ملاين مواطن ، موش كان عزيز راهو ، يتمسخروا عليك ! 

قدّاش ، قدّاش كسرتوها الأقلام ، وسّختوها الأعلام ! قدّاش ، قدّاش بكّيتو من إميمة و قدّاش قدّاش عفستو على  أيتام !

قدّاش من عزيز وقدّاش من ثورة تلزمك باش تولي إنسان ؟

 

 

لزهر شكبّة

"من سوء حظّيَ أَن الصليب

هو السُلَّمُ الأزليُّ إلى غدنا ! " 

يمشي يتدهشر ، ما يحلالو حتى معشر ، العام أثناش الفم الأبخر والعينين ما تراش . عمرو ما عاشر و كان عاشر راهو عاشر الحيوط ، دنيا زهرّات ، دنيا بخوت ...

لزهر وليدها ، يعمل منها نص ، يحكيلك على العراق  وعالمخبل في كبّة :  حرب الخليج عبد الناصر أم كلثوم والقومية ، يحكي عالنضال والإنسانية ستالين  والشيوعية يزيدها مالوف الوطنية  و يقوم ينوّح كيف الولية كيف يتفكر البطّالة كيفو والهجاجل والمرماجية  ،  تكثر عليه الجوجمة ، يتضرب يتملص ، ويزيدها لص  .... لزهر

مقص ، رد بالك تسلفو ،  ورد بالك ما تسلفوش ، يتكلم برشة لغات أما عمرو ما يحكي بالفلوس ، لزهر ممصوص ... يا لندرى آشنية غلبتو ، لا دار لا امالي ، رد بالك تقول عليه زوالي ، عايش بالشكبّة والقمار ، قرطاس حلوة فليّو يعمل بيه  آفار   ، لزهر عمرو ما يتشكّى ، ديمة صايم ساعات يتعشى ،   دنڨري فوق المريول خلعة ، مشات ناس وجات ناس ، ولزهر كيف ما هو ، قرطاس فليّو و مريول خلعة ، لزهر بلعة

... 

 لزهر زهواني ، كلامو زلعة ، ديمة يضحك تقول عامل بالعاني ،  تجبدلو عالدنيا يڨحرلك  ، يضحك  و  يزيد الولعة يقول :  طريّح شكبة . 

 لزهر توا شهور ، ملي  قالوا ثورة ومظاهرات ، هز حلوة الفليو وتخبّا 

  ...

 

 "لازم تربّى وعمل قلب وولا راجل  " يا راجل أخطاك راهو غاطس في بعض البلعة " " خلى بلاصتو الطحان تو يرجع " " حد ما يعرف وين يسكن ؟ ملا بهبار ، لا نهار ريتو ماخو الكار ، باز كالفار غاطس في بار "مسلفو عشرة آلاف وين سماه ؟"  "صاحبي أخطاك ، نعرف على بلاه ؟ " 

  

 

...

  يدخل الفرخ يجري ، كشاكشو بن شفايفو بالشهقة يهتري :" يا جماعة شفت لزهر في الفايسبوك ، متأكد  هو لزهر ،  لزهر متاعنا ، مريولو لبيض  أحمر دم ، غطاوه بالدنڨري وزادو فوقو العلم   ، ايجاو شوفو لزهر ناكوه الحنوشة ، لزهر  شكبّة مات شهيد بكرتوشة "



لزهر إلي يطيحلو تطلعلو قرعة ، لزهر كيف برشة ملي مشاو ، لزهر ماهوش بدعة ...
ويزيدها لص 

........



 هيا على ريحة لزهر ،   طرح شكبّة ؟  

 ... 

العار في الأفريكار

 جرذان  خرجت من الغار ،  متسلحفة متحلفة  متحالفة في شوالق غريبة متلحفة . الفتشاطة الضلفة واللغة الحرفة ، جرذان الاستغفار   تحبوها تناقش الأفكار ؟  قلك يا سيدي بو لحية على الاسلام غار ،  يعمبو هاك النهار ، إلي شعلنالكم فيه الفنار ، قلنا توانسة امالينا ، درتو علينا،  هزيتو درابو سواد  تناديو للاستشهاد ، بعد ما حلينالهم البيبان ، ودفعنا عالحرية الأكباد  ، زعمة إنتوما عباد ؟

تفيه عالسفيه ، لا خير فيه ولا في إلي يدافع عليه ! لا ،  الديمقراطية ماهياش همجية ! لا ،  موش بإسم الحرية باش تحلوا فينا جعفرية ! يعمبويا إذا خليتكم تكملوا في هاك الثنية : هذي بلادي ، مستقبل أولادي ، عليه نعيط نكفر نسكر نحمل ونهمل ، بجواجيا ندادي ، كنت ساكت هاني راجع كلمتي سلاحي   ، اضرب كسّر كفّر نبّر ،تونس عرقت دم عليك باش تعبّر ، وإنت ليوم في نوارها تهدّم ، تڨدم تفتي وتحرّم ، تفيه عالخرشي ، عالقلب المرزي ، تفيه ! 

   يا خوانجي يا سفيه،  تونس هي ربي سري صورتي صرتي ضحكتي ودمعتي ، يا خوانجي يا باندي ، بلادي مزيانة ، كبيرة، خشينة، بلادي أميمة حنينة ، مرا حرة ، فنانة زعبانة ، لغتنا ولوغتك ما يتقابلوش ، هز ربك وأسرح لبلدان الظلمة ، خلينا نكملو الحلمة ، وكيف أحنا كفار ، على الله ، خلينا أحرار في بعضنا ، لا رحمنا

  

سامحني أنا مواطن

سامحني راني إرهابي تهمتي نحب بلادي !

سامحني،  سامحني نتعدى  والبلاد  تنين ، سامحني ما شديتش اليمين حرقت الضو سامحني أنا معادش دكو ،    سامحني من الرواري عندي ثنين ، سامحني عندي خشم وزوز عينين ، سامحني مانيش كائن فضاء سامحني أنا اليوم عندي إنتماء ، سامحني نبكي ، سامحني كيف تهد نجري ، سامحني مغلغل نحكي ، سامحني من اللكرموجان نهتري ، سامحني بالحرية نكبري ، سامحني رجعلي قدري ، سامحني أنا صحافي رشاشتي قلم وتصويرة ، سامحني أنا غشيرة صغيرة ، سامحني أنا كنت في البار نعمل في كعبة بيرة ، سامحني أنا متعدي نشري في خبزة ، سامحني أنا طفل صغير مروح بالكرتابلة ، سامحني أنا راجل كبير ، سامحني أنا طالب خرجت نعبر ، سامحني أنا مدون خرجت نصور ، سامحني أنا إنسان نصور في الظلم من البرطمان ، سامحني أنا إلي البارح حرقت البيان  !  

   سامحني نعبر على رايي نقول كليمتين ، سامحني وجهي عريان و أندادي ماهمش كيفك مخبين  ! سامحني خرجت باش نطرشق من جواجية ما عادش مستحمل المسرحية ، سامحني عندي قلب وضمير ، سامحني على مستقبل ولادي نغير ، سامحني معادش تجد علي لغة التغيير ، سامحني يا مدير !

 

يال  خيبة الدولة   

Piensa en mi

si tu n'existais pas je t'aurais inventée . 

Chut Libre:

هرمنا
والهم ڨدمنا ، من الضحكة حرمنا ، لا حد سمعنا ولا حد فهمنا . حبّينا ، ضعنا ،سهرنا وسكرنا ولا نهار على كلمة نحبك ندمنا . علّي خان الكلمة ساح دمنا ، زدنا نقمنا ، حبّينا و في ثنايا جدد قدّمنا .

:Bent Trad

انا ؟هرمت!!! انا ؟؟؟ تهدمّت، تدمرّت و جيت انتِ و انا كبرت ، كان جيت صغيرة راني تحدّيت و زدمت !!! قلبي عريان و بدني جيعان و مخّي يسكر كلّ ليلة متلهّف عطشان للنوم في امان بلا احلام و بلا ازرق العينين الي بش يعيشوا ديما عليه شاردين و هذا العشق بكلّو حنين و أنين موش عارف القبلة فين و لاّ الهربة منين !!!

Chut Libre:

علاش تحب تهرب من شفرة عينك ؟ ما قالولكش عينيا في سكاتهم ما أكبر زينك ؟ كيفاش تهرب من قلبك و المحبة دينك ؟ خليني نغنيلك ونصور حمامة على جبينك . اتطير الحمامة ، و روايتنا تقعد شجرة لوز مفتح بيني وبينك .

:Bent Trad

نهرب !! و انا نجّم نقرب ؟؟ أنا الفرططّو و انت النّار و كان جوانحي تحرقوا كيفاش نلقى الدّار ؟؟؟ يزّيني ما همت يزّينت ما شربت، يزّيني ما سكرت : شبت و الشيب رعى قلبي و عيني و قبل الفرح، دمع الفرقة و الغياب ماليني !! كان نحكيلك في عوض ما تتغزّل اكيد ترثيني علاش بعينك تملك كنيني و انت لاك بايعني و لا تنجّم تشريني!!!

:Chut Libre

باش نرثيك و حتى الدموع نكرت فيا ؟ انجم نغطيك بيدي اليمين وباليسار نكتب فيك جدارية ... وتحير اليسار بأنا لغة تصور غجرية ... وإذا جواجيك تحرقوا حلال فيك روارية غير ما تنساش في هاك النهار لون الحقيقة في عينيا ، ريحة الحريقة والدمعة تسري فوق خديا

Bent Trad: 

..........................................

Chut Libre:

بنت طراد فينك ؟ شبيك مشيت عليا ؟ باهي إمشي ، ورد بالك من الشمس ومن المطر ورد بالك كيف تشق الثنية . وأرجع ، حمامتنا توريك الثنية ، وأرجع ...
  إنت زادة أهلي و إمالية 

 

 

 

 

بنت طراد ، ايجا نحكيلك ...

 
"Je me dis : la terre est brève-

L’Angoisse – absolue –

Nombreux les meurtris,

Et puis après ?"

E. Dickinson

Bent Trad

 احكيلي ما تشكيلي خلّي كلامك فنّ تشكيلي !!

Chut Libre

 نحكيلك من ورا البيبان، من غير ما إناديلك ، نحكيلك حكاية الانسان

Bent Trad

الانسان الّي في عشقو خرّج قلبو عريان !!! و لا خافو يتبلّ ولا خافو ڨرسان احكيلي يمكن نطمان

Chut Libre

منين نبدا الحكاية ؟ أنا ناس نساتها الغناية ، عشقت السكات ، لعبت بالكلام ، تكلمت ، تألمت، وما قالتش . بردت و ما حكيتش . نجي عندك نتخبى ؟ تحكيلي عالمحبة ؟ تقلي زعمة علاش ؟

Bent Trad

و انا منين نعرف لعلاش و لاّ الكيفاش ؟؟؟ انا نعرف كيفك ، يمكن، كان اللّيل الڨرّاس الّي في قسوتو على كرايم العشّاق عفّاس !!! اما كان تحبّ تجيني ايجا و جيب كلامك فاليجا اذا ڨرسنا نعملوه غطى و نتخبّيو بيه عالسماء !

Chut Libre

نبداو الحكاية بريحة النسري ، نصبلك قهيوة تنسي ، والزهر في روايرينا خليه يسري ، اسمعني :

نحكيلك على الفليجة ، معبية أسرار الترهويجة ، فيها تصاور أبيض أسود ، فيها نصدق وفيها نكذب ، نحكيلك :

نحكيلك على عشيري ياسر :

في دشرة منسية ، عاش ياسر ، ومات ياسر . وفي قلبي قداش ياسر حي . ياسر الأبكم ، فهم الدنيا على بكري ، بلع لسانو ، غار على كلامو ، ما عطاه لحد . يقولوا عمرو ما تكلم . وياسر ياما تألم . جاء من بلاد بعيدة ، حد ما يعرف أصلو ، وكل واحد فصللو قصيدة . ياسر يتكلم بالتنهيدة . تغزر لوجهو تهزك التفرهيدة . حطيتو قدامي ، نعرفو مش كيفهم ، كيف نشكيلو، يفهم إلي بيا . قتلو :

ياسر خويا ، نعرفك تسمع فيا . إلي بيك راهو بيا . ما نعرفش حكايتك شنية ، أما نعرفك كيفي ، طوالت بيك الثنية . آش تهم الحكايات ، التفاصيل تتغير ، والمحاين هي هي .

Bent Trad

يا سر كلام في الظلام و يا سر الظلام غماق للي راقد و للي فاق !! لاعاد نور و لاعاد آفاق ما تلقى كان المشتاق !!

المشتاق لغزرة و دموعو غزيرة !!! المشتاق لكلمة و كلمتو اسيرة !! المشتاق لحلمة و هو الحيرة !!

Chut Libre

ولقيتك فهمت الحكاية ، من غير ما نطول ، ياسر هاو حذاية ، ساقيه مزروعة في التراب ، حذا راسو نبتت شجرة غريبة ، من هاك النهار تضلل علينا ، كيف ما نلقى شكون يفهم كلامي ، نمشي لياسر ، شجرتو تعرف تجبر بالخاطر ، وكيفها كيف ياسر ، من غير ما 

 تتكلم ، حنينة .

 

Ahlem Play-Back

كاد المعلم ان يكون رسولا

عرضتها في المحطة ، فليجتها على قلبها ، ووجهها مخطوف ، قلت نكلمها  زعمة ،  ولا كيف ما علمتني هي ، موش باهي الكلوف ؟ الشتاء تصب علينا ، وعصافر المدينة حزينة ،  وهي شادة التركينة ، قدمت :

-    مدام أحلام وين على خير ؟

-   مسافرة .

-  توا عندك أكثر من ساعة ، والمطر بلتلك شعرك ،  مزلت تستنى ؟

-  عندي 45 سنة نستنى .  والقناصة عدهم جاو . يلزمني نهرب !!!

-  القناصة وفاو !!!

-  لا ، موش هاكم، قناصة أخرين ، توا سنين بيا مترصدين ...

-  مدام أحلام ، هات الفليجة ، و إيجا نعملو قهوة حتى يجي الترينو . موش خير ؟ 

ومشينا للقهوة المقابلة ، وأنا ماني فاهم  ، قلت نستنى تو أحلام تتكلم ، وأحلام ساكتة، والسكات ضالم ...

-  أحلام ، شبيك ؟

- شي ما بيا ، وكل شي بيا . خايفة نفلت الترينو و  القناصة يخلطوا عليا .

-  شكونهم القناصة ؟؟

-  القناصة متاع الماضي ، خلاوني ضحكة بين أندادي ، نمشي ونتلفت ورايا ، ما عادش نغزر لوجهي في المراية . توة أكثر من عشرين سنة ، كلاني الندى ، عايشة مع أمي بباصة ، وما رفعتني حتى بلاصة . البرطمان كبير ، والقسم إلي نقري فيه صغير ، نحس بالخنقة ، كيف يضحكوا عليا التلامذة تشدني العبرة ، نولي نحكي معاهم بالنطرة ، يزيدوا يضحكوا عليا .  إيه يا حسرة ، نتفكر كيف خذيت الباك ، الوالد يرحمو ويخفف عليه وعليا  ، قلي اخطاك مالتعيلم ، خمم في الشهرية ! صححت راسي ، الصغر وجواجية ، مواقف زعمة ، نحب ننقذ البشرية . قداش كنت بوهالية !!! الحاصل ، كملت هاك الثنية ، وجات الشهرية ، متواضعة أما موش دونية . وتلمت الشهرية ، ولا من صغير يحاذي فيا .    من صغري برية ، ما نحبش الصحاب ، وما حبيتش على حتى راجل يعمل عليا تمثيلية . تعدات السنين ، والعيشة هي هي ...القناصة معبين الثنية .

- مدام أحلام ، شبيك قمت ؟ أقعد حذاية ! تاخو قهوة أخرى ؟ نرجع عندك نقرا ؟ نقلك إلي أنا ما نسيتش الطبلية ! مدام أحلام ، استنى ، بالشوية ، شبيك تجري  !!!! ستنى ..........

- رد بالك على روحك عيش ولدي ، خمم في الضحكة و في العيشة البنينة ، و ما تخمم في شهرية ! الدنيا خرشية، و حق هاك الشادلية !

وشقت أحلام الثنية ، لقفتها الكار ، تحلت الفليجة ، الكتاب طار ، تكسر البركار .......

  وأنا حبيت نقوللها ، إلي حتى أنا ، عندي قناصة يتبعوا فيا ...  

أحلام  مسافرة  ، و أحلام منسية ...وأستاذتي ماهيش منسية ، نخبيها في جيب الطبلية ...ونكمل ... نكمل المسرحية

* à la mémoire de CH.D , repose en paix ma très chère professeure, je vous aime et je n'ai pas oublié. 

Hommage à tous mes profs, de qui un jour j'ai osé ricaner.

en Hommage à tous les enseignants qui un jour ont croisé ma route.   

دنيا

الدنيا كلام ، والدنيا سكات ، الدنيا عياط و الدنيا سلام ، الدنيا ڨمرة وسط الضلام ، الدنيا أيام ما تخلِّف أيام .  الدنيا سحاب ، الدنيا أصحاب ، الدنيا خصومات ، والدنيا محبة ، الدنيا غرام ، الدنيا حكايات . الدنيا تنهيدات . الدنيا أوهام ، قلبك وحدو الحقيقة ، قلم يكتب بالدم ، وجيعة ما حبت تتلم  . الدنيا ما عليها ملام ، والملام ما ينفع مظام . الدنيا ، البكاء عليها حرام . الدنيا منام .

الدنيا حنينة ،  والدنيا  حزينة . الدنيا بعد الوجيعة بنينة .الدنيا جبّانة ، والدنيا جنينة .  مرة تضَحْكِك ومرة تدفنك في تركينة . الدنيا شمس كل يوم جديدة ، والدنيا دفينة . الدنيا عجيبة غريبة  . الدنيا رواية ، الدنيا قصيدة . الدنيا لينا ، وماهي لينا . الدنيا مسافرة ، الدنيا سفينة .  الدنيا ماكينة ،سعَّات الأرياح تلعب بينا  ، وسعَّات غزرة وحدة تنسِّينا . 

الدنيا نص يوفى بنقطة . الدنيا في الكتاب لقطة . الدنيا نكتة . الدنيا ناس تنسات ،ناس تكوات، ناس تمحات ، والدنيا ناس لوحات ، الدنيا نفحات . نفخة مالنفخات ، تجيبك لتالي ، الدنيا مجرم للزوالي ، الدنيا يتامى ، والدنيا ناس باعتها الإمَّالي ، الدنيا نحرها غالي . الدنيا جوع، والدنيا ناس كلات فوق الشبع ، الدنيا فقر ، الدنيا رهدانة ، الدنيا ضبع .  الدنيا ناس تجري عالأجر ،  ناس تصبّح للفجر ، الدنيا دوسيات ، دفاتر وحسابات، الدنيا سياسة ،وسوخات ، لغات .  ناس  عالمادة تبات ، وناس واخذة أكثر من بلاصة . الدنيا خاينة ، وهي ببّاصة .  الدنيا دين ،و مكتوب يقولوا عالجبين ، الدنيا منين ؟ لوين ؟ الدنيا هانا عايشين . الدنيا ، مرة موش مرتين . علاش مالا نموتوا بعد المرة ألفين ؟ الدنيا وجيعة تنسّي الاخرين ، تنقب العينين ، الدنيا ...خلينا ساكتين  .

الدنيا بداية، والدنيا نهاية . خليك حذايا . نحكيلك عالدنيا ، ننسى دايا ، نخرّفلك حكاية ، نغنيلك غناية ، نقلك الدنيا إنت ، وبلاش بيك أنا أنا ، وموش أنا  ...

الدنيا حنانة

الدنيا مخيبنا

و الدنيا محلانا

  *pour Bakhour

Je ne suis pas militant .

Je ne suis pas militant

Je suis à peine citoyen

À peine être humain

Je marche seul dans la boue le soir du réveillon

Ma joue brule seule dans le siroco de juin

Vos banderoles n'éloignent pas ma faim.

Je ne suis pas militant

Je sais à peine épeler mon chagrin.

Entre nous se dressent des murs mitoyens,

Les grands discours n'ont jamais bâtit de ponts

Je ne suis pas militant

Mon visage n'appartient qu'à moi

Et c'est à peine que je lui appartiens.

Je ne suis pas militant

Je ne veux pas être de ceux de devant

Vos pancartes ne me protègent pas du vent

Une simple chanson le fait si bien.

Je ne suis pas militant

Gardez vos grands parlers

Lâchez vos grands chevaux loin

Dans vos slogans il n y a pas mon demain.

Je ne suis pas militant

Sur le papier je trace seul mon chemin.

Pour applaudir il faut deux mains

Et c'est à peine que je tiens mon cœur en main.

Je ne suis pas militant

Pour militer il faut presser le pas

Bien se tenir dans les rangs,

Déclarer la guerre aux loups, aux méchants,

Savoir préparer les appâts

Et c'est à peine que je déguste mon repas.

Je ne suis pas militant

Avec le journal du matin je racle ma vitre

Des radios je fais un fifre

Je n'ai pas besoin d'apparaitre pour vivre

Pour militer il faut aimer les flashs des caméras

Et c'est dans le soleil que je me noie.

Militez, et foutez-moi la paix

Je ne suis pas militant

C’est à peine que je viens de naitre

Libre, je veux être, et disparaitre.

Pour militer, il faut adhérer

Il faut des verbes associés

Des poèmes à la trainée

Des dégage, des abus de langage, 

De la rage, déraciner les plantes sauvages

Et c'est à peine que j'ai appris à planter.

je ne suis pas militant

Pour militer il faut appartenir

Maudire

Haïr

Choisir

Courir

Et c'est à peine que je sais marcher

Pour militer,

Il ne faut pas appartenir au peuple

Mais le peuple devenir

Et c'est à peine que j'appartiens à mon olivier.

Je ne suis pas militant

Et si un jour, je le deviendrai

Je militerai pour ne jamais être

Militant.