دنيا

الدنيا كلام ، والدنيا سكات ، الدنيا عياط و الدنيا سلام ، الدنيا ڨمرة وسط الضلام ، الدنيا أيام ما تخلِّف أيام .  الدنيا سحاب ، الدنيا أصحاب ، الدنيا خصومات ، والدنيا محبة ، الدنيا غرام ، الدنيا حكايات . الدنيا تنهيدات . الدنيا أوهام ، قلبك وحدو الحقيقة ، قلم يكتب بالدم ، وجيعة ما حبت تتلم  . الدنيا ما عليها ملام ، والملام ما ينفع مظام . الدنيا ، البكاء عليها حرام . الدنيا منام .

الدنيا حنينة ،  والدنيا  حزينة . الدنيا بعد الوجيعة بنينة .الدنيا جبّانة ، والدنيا جنينة .  مرة تضَحْكِك ومرة تدفنك في تركينة . الدنيا شمس كل يوم جديدة ، والدنيا دفينة . الدنيا عجيبة غريبة  . الدنيا رواية ، الدنيا قصيدة . الدنيا لينا ، وماهي لينا . الدنيا مسافرة ، الدنيا سفينة .  الدنيا ماكينة ،سعَّات الأرياح تلعب بينا  ، وسعَّات غزرة وحدة تنسِّينا . 

الدنيا نص يوفى بنقطة . الدنيا في الكتاب لقطة . الدنيا نكتة . الدنيا ناس تنسات ،ناس تكوات، ناس تمحات ، والدنيا ناس لوحات ، الدنيا نفحات . نفخة مالنفخات ، تجيبك لتالي ، الدنيا مجرم للزوالي ، الدنيا يتامى ، والدنيا ناس باعتها الإمَّالي ، الدنيا نحرها غالي . الدنيا جوع، والدنيا ناس كلات فوق الشبع ، الدنيا فقر ، الدنيا رهدانة ، الدنيا ضبع .  الدنيا ناس تجري عالأجر ،  ناس تصبّح للفجر ، الدنيا دوسيات ، دفاتر وحسابات، الدنيا سياسة ،وسوخات ، لغات .  ناس  عالمادة تبات ، وناس واخذة أكثر من بلاصة . الدنيا خاينة ، وهي ببّاصة .  الدنيا دين ،و مكتوب يقولوا عالجبين ، الدنيا منين ؟ لوين ؟ الدنيا هانا عايشين . الدنيا ، مرة موش مرتين . علاش مالا نموتوا بعد المرة ألفين ؟ الدنيا وجيعة تنسّي الاخرين ، تنقب العينين ، الدنيا ...خلينا ساكتين  .

الدنيا بداية، والدنيا نهاية . خليك حذايا . نحكيلك عالدنيا ، ننسى دايا ، نخرّفلك حكاية ، نغنيلك غناية ، نقلك الدنيا إنت ، وبلاش بيك أنا أنا ، وموش أنا  ...

الدنيا حنانة

الدنيا مخيبنا

و الدنيا محلانا

  *pour Bakhour