Ahlem Play-Back

كاد المعلم ان يكون رسولا

عرضتها في المحطة ، فليجتها على قلبها ، ووجهها مخطوف ، قلت نكلمها  زعمة ،  ولا كيف ما علمتني هي ، موش باهي الكلوف ؟ الشتاء تصب علينا ، وعصافر المدينة حزينة ،  وهي شادة التركينة ، قدمت :

-    مدام أحلام وين على خير ؟

-   مسافرة .

-  توا عندك أكثر من ساعة ، والمطر بلتلك شعرك ،  مزلت تستنى ؟

-  عندي 45 سنة نستنى .  والقناصة عدهم جاو . يلزمني نهرب !!!

-  القناصة وفاو !!!

-  لا ، موش هاكم، قناصة أخرين ، توا سنين بيا مترصدين ...

-  مدام أحلام ، هات الفليجة ، و إيجا نعملو قهوة حتى يجي الترينو . موش خير ؟ 

ومشينا للقهوة المقابلة ، وأنا ماني فاهم  ، قلت نستنى تو أحلام تتكلم ، وأحلام ساكتة، والسكات ضالم ...

-  أحلام ، شبيك ؟

- شي ما بيا ، وكل شي بيا . خايفة نفلت الترينو و  القناصة يخلطوا عليا .

-  شكونهم القناصة ؟؟

-  القناصة متاع الماضي ، خلاوني ضحكة بين أندادي ، نمشي ونتلفت ورايا ، ما عادش نغزر لوجهي في المراية . توة أكثر من عشرين سنة ، كلاني الندى ، عايشة مع أمي بباصة ، وما رفعتني حتى بلاصة . البرطمان كبير ، والقسم إلي نقري فيه صغير ، نحس بالخنقة ، كيف يضحكوا عليا التلامذة تشدني العبرة ، نولي نحكي معاهم بالنطرة ، يزيدوا يضحكوا عليا .  إيه يا حسرة ، نتفكر كيف خذيت الباك ، الوالد يرحمو ويخفف عليه وعليا  ، قلي اخطاك مالتعيلم ، خمم في الشهرية ! صححت راسي ، الصغر وجواجية ، مواقف زعمة ، نحب ننقذ البشرية . قداش كنت بوهالية !!! الحاصل ، كملت هاك الثنية ، وجات الشهرية ، متواضعة أما موش دونية . وتلمت الشهرية ، ولا من صغير يحاذي فيا .    من صغري برية ، ما نحبش الصحاب ، وما حبيتش على حتى راجل يعمل عليا تمثيلية . تعدات السنين ، والعيشة هي هي ...القناصة معبين الثنية .

- مدام أحلام ، شبيك قمت ؟ أقعد حذاية ! تاخو قهوة أخرى ؟ نرجع عندك نقرا ؟ نقلك إلي أنا ما نسيتش الطبلية ! مدام أحلام ، استنى ، بالشوية ، شبيك تجري  !!!! ستنى ..........

- رد بالك على روحك عيش ولدي ، خمم في الضحكة و في العيشة البنينة ، و ما تخمم في شهرية ! الدنيا خرشية، و حق هاك الشادلية !

وشقت أحلام الثنية ، لقفتها الكار ، تحلت الفليجة ، الكتاب طار ، تكسر البركار .......

  وأنا حبيت نقوللها ، إلي حتى أنا ، عندي قناصة يتبعوا فيا ...  

أحلام  مسافرة  ، و أحلام منسية ...وأستاذتي ماهيش منسية ، نخبيها في جيب الطبلية ...ونكمل ... نكمل المسرحية

* à la mémoire de CH.D , repose en paix ma très chère professeure, je vous aime et je n'ai pas oublié. 

Hommage à tous mes profs, de qui un jour j'ai osé ricaner.

en Hommage à tous les enseignants qui un jour ont croisé ma route.