بكل حزم نفسيتي هشة

أنا تونسي قالوا نفسيتي هشة ، أنا تاريخ جبان ، أنا البارح طحان ،اليوم مشروع  إنسان . أنا نفسيتي هشة ، خليت الدشرة و خرجت مالقشرة ، نتفزعك بالكرهبة بالبورطابل و السلعة الغشة ،نفرني و نكردي ، عيشة jetable  ، وليت sortable  و نسيت اللهجة . إيييييه ، أنا نفسي هشة ، تلعب بيا الأرياح كيف القشة ، من أرجع غدوة بعت عمري على فيزا و هجة ، أخلاقي عدمت ، نتكلم بالنشة ، نسيت الثقة ، ما عاد نأمن بعشرة . خارج مفجوع ، داخل مخلوع ، نشوف روحي كيف الحشرة ، بلادي كلاتني خلاتني جثة . قريت و زعمة وليت ، permis بالفلوس شريت ، و في الكاباس فما أتعس مني شكبو عليا بالعشرة ، جيت البرة ، عشقت القهوة المرة ، حرقت جواجيا ، حسيت بالغدرة ، ندز في ساقي بالتقراق ، نسرق في الضحكة بالنطرة ،علاقاتي نفاق، عالمزيرية كتبت الصداق ،  إييييه نفسيتي هشة يا عصابة السراق !  إييييه نفسي هشة و تونسنا ولات مورسطان ، إلي يبكي أكثر مالفرحان ، الغارق أكثر مالعوام ،  أنا سيدي بو زيد و سيدي بوزيد أنا، نتكلم نتكلم و نزيد ، البارح أنا جبان و اليوم الحق فينا بان ، اليوم حرية ، موش على كيفكم ، على كيف نفسي الهشة ، على كيف التوانسة و الجمهورية ، على كيف كل ولية بكات ، على جاليتنا إلي تنفات ، على قدرنا إلي تستخايلوه مات . في تونس ما يستحق الحياة ، و بكل حزم ، نقوموا مالردم يزيونا قهر ، يزيونا سكات !!!! 

غدوة غدوة  ننسى ...ننسى إلي فات ... و في بلادي حر نبات 

نعيش نعيش و يحيا الوطن

نهاركم زين و بنزين ، درابونا موش مكسر ، درابونا اليوم حزين . 

نهارنا فل مسروق ، رهدانة يعلييو في البوق ، و صوتك الحقاني يا تونس مخنوق .  تونسي موش بالعاني ، و تونسي لوكان الالوان تنساني،  بلادي في قلبي ما تخطاني  ، نعاني و مكمل نزيد ، نحارب بلساني ما نشعل وقيد . خليك عايش ، كلانا الصديد ، تموت إنت ، يتكسر القرميد . خليك عايش عيط معايا ، إتفقد خوك ، إتدفى حذايا ، ساقي ساقك  ، نغنيو غناية ، تحرق روحك ، ما يفيد اللوم، ما يسقي الورد بكايا .

حكايتنا حكاية ،طوالت بينا التمثيلية، تموت إنت ، لشكون كلامي لشكون الرواية؟ نتدهشر ندوخ ، خليك قدامي ، نضحكلك قريب توفى المسرحية ، نلقاك ما عادش تصفق ،متغطي بيك و بيا، ما عاد فينا براني .  نهارنا دفلة و حليب الاميمة يحرم عليا ، كان مزلت ننساك و مكمل في الأنانية . ما نحرقش روحي نجي نسال عليك ، تونس بعبادها غدوة تفيق . هيا شعل شمعة في شباكك ، إضوي عليا نضوي عليك . كلاتنا النهبة ، في العين نكبة ، عراتنا السرقة ، تحرق روحك و تمشي عليا ، تزيدني في غربتي غربتين ، يضحك الظلم ، يزيدونا في الريق . مدقدق كيفك ، كلمتك سيفك ، علي صوتك حد ما يملي عليك . لشكون يا تونس تفاحك ؟ لشكون يا تونس نواحك؟ علي يبني و يعلي ، علي ينهب و يغلي ، علي يكرتش ما يخلي ، و لا على ولدك إلي مشى بين ساقيك ؟    

نهارنا زين و بنزين ، قتلو التعليم ، شباب معتم ، شباب بهيم ، بريكية عمارة ، لغة سحارة ،فن قبيح ، ضمائر تلاويح ،  مالبنفسج نعبيو شكارة ، علاش مالا نشيمو في القيح ؟   إيه البارح غافلين ، بالخوف جافلين ،  ما تحرقش روحك أحرق تلفزة التتليه . ما تشنقش روحك اشنق تصاور التأليه ،غدوة القهر يطيح . 

و مخاضك يا تونس إنتحار

يا أيها النائمون هناك

من يشتري حزني بذكرى وطن ؟

من يطرد الحريق من قلبي ؟

من ينقذ الغريق ؟

من يقول لبيروت هنا

أن بيروت اليوم هناك ؟

مسافرون نحوك دوماً

دون سفر

قادمون من أعناق الياسمين

بقايا بشر

نفتش عن إنتماء الصوت

نفتش عن البلاد

ننسى أننا أطفالها

و ننسى أنها إقتلعتنا

من براثن الغير

 من مواسم الضجر

ما عاد فيك شيء يشبهني

 و هناك أشبه كل الأشياء

و القمر

مازلنا نحبك

و قد نسينا أن نحب

و أن نغار

ردي لي يا تونس

الورد المسروق من خدي

ردي لي جسدي

لأسترد ضلي

ضلك

كي أعود إلينا...

صار الحزن بيننا أكبر من دمعنا

فإستأصلي من أيامنا

هذا الدمار

تونس أنت

أفلا يتذكرون ؟

و أنت أعلى

و أنت الأغلى

من رقص العرائس

دون الضلال

و أنت أعلى

 من نحر الحمام

حتى القصائد قبل مواسمها

خانتها الأقلام

محبوسون هم

في معلقات الخيل

في جلد الغناء 

في حور الفناء

تونس ترتدي الرماد 

و تختفي في البحر

في اللون المعلق 

بين جبهتها و العباد

يصلبون فيها الخارجين

عن الدمع

بتهمة الضحك

في ليل السبات

يصلبون فيها من حار

 من قال

من شاء

و من لم يشاء

ما هكذا عهدتنا

و لكنني أحبها

غصن زيتون يبارز القدر

 و لكنني أحبها

قبل و بعد الثلج 

و النار

بالدم أحبها

 و بالأظفار

إن الوطن يولد حين يموت 

و مخاضك  يا تونس  إنتحار

عليك نغني

"الكرامة غضب و المحبة غضب و الغضب الأحلى بلدي "  

تونسنا شمس و زيتونة ،عمار بالمقص يديه ممكونة، بو لحية عالكلمة يشد مڨرونة  .

تونس طبعة تحكيلنا على الوجبة الصباحية للباندا المسكينة  في الغابات الأسترالية ،على حركة السير بالشوارع الباريزية و المحافل القزوردية ، و على الصيد العشوائي للفيل الأشهب بالتتليهستان  . تونس يا مورستان، تسكرت فيك البيبان ، سيدي بوزيد موش متغطي، سيدي بوزيد عريان .

عيفتونا ، فددتونا، مشات علينا الضحكة ، مشات علينا الفرتونة . تونس يا غالية ونتي مرزية ، ماكش تشم في النتونة ؟ رد عليا  !

الميزيرية بالبالة ، البهامة تنيك في الحالة ، شطرنا زطالة ،و  شطرنا بطالة . العينين تغزر و القلوب ممحونة . Rap  الغلبة ، بالترهيب فطشاتو مدهونة .   discours  الحور و الرضا و النور شيبة ، برا هكاكة يا عمي الشيفور ، بيناتنا البابور ، بيناتنا التنهيدة . 

التونسي للتونسي فحمة ، أنا  نتحرق اليوم ،  إنت غدوة تدفى  . فماش ما الضمائر الميتة تقوم ، يا تونس ما نعرفش نعوم ، غالية عليا الشقفة .

ناس هاززها الهم ، تشهق ما تلحق ، تبكي ما تنطق ، و ناس تحلم بالولدان . شبيبة دغفة  ، تلعب بيها الوديان .

حيوطك يا تونس خايخة ، نوارك بلاستيك، أشجارك صايشة ، مشمومك يبكي عليك . أعياد العلفة ، اللغة الضلفة ، ما عاد من يصبح ، التصطيكة للخالق تسبح ، الكلاب تنبح ، كيرانك ديمة  retard،  الڨافلة تسير ، تنبير و تبندير . نجي نلوم نحير ...

يا تونس  وين الألوان ؟ وينك يا وجه الخير ؟

وينك يا وجه الخير ؟

عليك نغني و عليك نبكي ، مكمل بهمي،  نخاف غدوة نقوم ما نلقاك ... يا تونس هجرك الطير ...

    غارق , غارق علينا هالبير .

تونس اليوم ، تبغ و وقيد

نموت نموت و يحيا الوطن

غدوة نحرق

 غدوة نحرق بدني موش نحرق في شقفة ، نخليها العيشة بمذلة،  ما حاجتي بشفقة . نحرق وجهي مالقيت وين نخبيه، نحرق قدري لشكون نخليه ، نحرق صوتي ، نحرق سكاتي، نحرق أمي نهزها معايا في رمادي  ، ما نحرقش بلادي للنار رماتني. نحرق ديبلومي عليه حرم  نومي ،  نحرق بينومي ما نحرقش الكلية ، نحرق أندادي،  أعياد خواتي، نحرق عينيا يزي ما بكاو عليا ، نحرق الكذبة ، نحرق المسرحية . نشهق ما نلحق،  نتكلم نطرشق  ، لا حد سمع بيا ، ناكتني البلدية .  نحرق قال أبي مبروك ، نحرق كراس المحفوظات،   نحرق صغري ، نحرق lليوم ،نحرق غدوة ، نحرق l'antidépresseur ، نحرق الغدة  ، نحرق السيد الوالد ، نحرق السيد الوالي ، نحرق باعث القناة ، نحرق الجمعية ، نحرق الكوارجية . نحرق إبتسم انها تونس ،نحرق صبر يونس، نحرق الخرافات ، نحرق شباب المستقبل، نحرق القروضات . شمعتي طفات، دمعتي وفات، نحرق إلي جاي ، نحرق إلي فات . تونس يا خايبة ، تونس يا حنينة ،الأرياح تلعب بينا، وين العلم ؟ وين سماك ؟ 

قعدلنا البحر ، كاس التاي المر ، ساق هوني ساق في القبر ، فلا بدّ أن يستجيب القدر   .

 

نحرق الباتيندة ، يا عون البلدية حط التيندة ، غدوة الشتاء تصب عليكم جواجيا

* work © Soulef Abbes  

  * en hommage à ces deux jeunes hommes qui n'ont pas trouvé 

de secours à part le feu. Paix à leurs âmes.

Gavroche weld blèdi

سلاماً  سلاماً سلاماً على الجالية التونسية المقيمة بالأنحاء المنفية و الغير مقيمة بالانترنات . سلاماً على الجالية إلي ماتعرفش تمقيص  topnet و planet ، الجالية المقيمة في البالانصيات ماكلتها الشلوق و البحورات ،الجالية إلي ناكتها الزطلة و الحانات ،  التوانسة إلي يكلتو مالصباح للطياح في معامل التهتيك ، الجالية إلي صوتها  مفكوك ، و ما تعرفش  فايسبوك، الجالية إلي في الفحص و السرس و العقارب و الجالية إلي في الهوارب ، الجالية المزيانة من غير chirurgie تستويك ، الجالية إلي لا تعرف فتوى ، عايشة في الندوى، ما عندها وقت  للريق و التوكويك . سلاماً سلاماً على الفحام ،و الناس الضخام ناساها البيليك ، الناس المستكفية ، بكانون متدفية . سلاماً عالحراقة و إلي في الأسواق هباطة ، سلاما على المرماجية بالبرد وجوههم  مكوية ، سلاماً على زبال البلدية . سلاماً على الهجالة ، و إلي وردتها مذبالة ، سلاماً علي ديونهم بالبالة ، ما يرضاوش  ببطالة . سلاماً   علي مستكفي بحالو ، دينو سؤالو ، علي يصبح عليك و بالكلمة الحنينة ينسيك . سلاماً علي يشهق ما يلحق ، علي يكلت ما يسرق ، علي ما يعرف réveillon ، امورو condition ، ساكت مستقنع، يضحك مخنوق ، مزمر بالهم مشنوق . سلاماً علي نساتو الصحافة و الغنايات ، وين يطيح الليل يبات. سلاماً سلاماً سلاماً عليك تونسي أكثر مني، راسك عالي، قدرك غالي . 

و علي نساك ،يتعدى يلوم ، داه النوم ،  مسوك بالغرم ، يقرقش في الحناك ،يجيه نهار يقوم ، يشري من عندك  خبز  الطابونة و المشموم  ، تقلو أحسنت ، تحشم منو الكلمات

* vendeur de caméléon © Soulef Abbes

 

Lassâad Spa

 Le Tourisme sexuel en Tunisie , 

   .   ظروف

قالوا جبري ، نقمت ، بديت نخدم قبل الباك ، شريت الفيسبا وليت نكبري ، نخدم لكبري ، مصروف  الفاك 

 

عيطولي وليدات  : لسعد ايجا شوف،   بعد علينا الكلوف ، خدمة خفيفة نظيفة ،  فيها الفلوس ، من غير سرقة و لا بيعات .  كنت ديقردي ، سمعت الكلام ، شديت الثنية ، عملت carte visite ، نخدم أشغال عامة تابع وزارة السياحة ، jamais sans rendez-vous ، نتكلم برشة لغات .  يعيطولي أقوى الوتلة ، نمشي مالليل لليل ، نحط الحطة ، نكركر في الختلة ، يعرضني بابا عزيزني وين ماشين ، نتفاهمو عالسوم بالعينين ، حكاية خفيفة نظيفة ، انتف مصروف ، نروح ريحتي ويسكي ، بدني مخطوف

نسكر الباب ورايا ، تسخف عليا المرايا ، تحكيلي حكاية  و تقلي ظروف . ناكل لسعد بالكفوف   .  " يكب سعدك يا لسعد كل ليلة تجيني سكران "، لميمة غطي ولدك ، لسعد عريان 

حسدوني لولاد قالوا لسعد ما عادش معبرنا ، يتعدى ما يقولش السلام . لو كان يلقاولي بدني ، تو نسلم بالإيد،و نزيد نترمى نعنق ، للمحبة جيعان 

برشة كيف لسعد مشاو  ، برشة كيف لسعد بكاو ، و برشة كيف لسعد مع مرايا  تنفاو   

* en hommage à Lassâad Spa, qui continue à parler à son miroir, 

quelque part dans notre pays

Shizophrène ma Patrie .

C'est moi, moi,

je gisais entre vous, j'étais

ouvert, étais

audible, je tendais les doigts vers vous, votre souffle

obéissait, c'est

toujours moi, vous

dormiez n'est-ce pas ?

Paul Celan

اليوم عيد ميلادي , عمري 29 . عيد ميلادو هو مش عيد ميلادي أنا. كبر و ما ريتوش , ريتو كي سكر , نكرت فيه,ما عقلتوش ؟ ولدك يا تونس علاش إتدز فيا ؟ البحر غارق , مانيش عوام . ماكل شارب ديما هارب ، متغطي مانيش عريان ، علاش مالا البرد ياكل فيا ؟

تونس يا خايبة ، تونس يا حنينة ، نكلم فيك ، شبيك موش تسمع فيا ؟ 

29 و يوم ، غدوة نقوم نلقى مشموم نقول قداشني مرزي بلادي تخمم فيا .

ما نطولش عليك الكلام ، إلي يتكلمو برشة ، ولي يشدولي يدي شوية . تطول بيا الثنية ؛

29 ما نعرفش كيفاش ، ضحكت، لبست، سهرت، قريت ،حليت كتاب ،سمعت غناية، نسيت . حليت الباب خرجت نلوج على وجهك نلقى الحيوط معبية مسامر ، وأنا تصويرتي منسية . بكيت .

نتفكرك كيف كنت مزيانة و أنا صغير نفرح كيف نلبس طبلية . نخرج للقهوى ننسى السكر ، مانلقاش زهر ،  نصب في الكاس عينيا .   تونس يا حنينة نضحكلك ، ماني ولدك علاش ناسيتني ؟ سبني ، جاوبني ، نحكيلك في خرافتي، و فما كيفي برشة ، علاش نحس في روحي وحدي ؟  أضحكلي نستنى فيك . 29 شمعة ، 29 دمعة، قداش نحبك و قداش نلوم عليك !

مسالش ما تجوابنيش ، خليني عالعتبة ، العام الجاي نتفقدك، ما تقليش  شبيك 30 سماء و ما كبرتش ؟ 

نقلك موش عيد ميلادي أنا ، عيد ميلادو هو . تونس محلاني بيك ، و محلاني بلاش بيا

.  

 pour Ludovic

و هذا البلد الأمين

قال الأسد يتكلم  ، يسبح للخالق

 ناقصنا تحلل و تحرم  ماكلة المخارق

بوكشطة فيق كوارطك مكشوفة

أفلامك ماصطة ،سلعتك  مغشوشة

تقول عليا كافر نسمع الغناء

نسهر و نسكر نعشق المرا

ديني مخي ، بيني بين إلي خلقني

عابدلي وجهي ، نتكلم تخنقني

نطلع في تاكسي تنقز مالراديو

ألفة يوسف تكتب كتاب، قبل ما تقراه تحشو

تحكي عالعورة ونتي من قلة الحياء تعبي دبو

قلت أنثى كافرة ، تحكي عالقرآن سافرة

تحبوها في شكارة ، تقولوا نقاب

كان ماهيش تحت صباتك، تقولوا قحاب

المرا الحرة ذكية  و فنانة ،

سوسن معالج خلاتك تغلي

ركبتلك الحكاك، عمتلتك الجدري

شبي خويا اللطف عليك ممكون ؟

حليت في البلاد فتارية على جرد كلسون

يا عنصر فيق يزي مالكحولية ،

لوبانتك وفات، ما تهرطقش عليا

هاني مستحملك، برا ديموقراطية

على جبينك فلسة ، هاربة بيك فرسة

لحيتك بطانية ، مرتك goldorak

نراك في الزنقة نبدل الثنية نخاف  ولدي يراك

تسب المرا تقول لابسة العريان

مرتك دافنها ، مخرجها batman

إعبد ربك ، صومني ما تدورش بيا

تضحك عالجبالي تقول بنتو موش صبية

قحبلوجيا ديماغوجية ، ريق متع جاهلية

في البيرو يحب يرضع زميلتو ، يستبله فيا .

"أخي لا تصافحني " تصافحك لفعة

ما نحبش نسبك ، انتي دونت عليا

خرجت الطلامس، عملت تمثيلية

مانيش هايشة بكمة تتكلم على لساني

 نقول إلي نحب ، ديني سؤالي ، عندك عنواني

من غير ما تبدا تبيراتي فيا !

 على بلادي نغير

 سيبني نحير

تقلي عذاب كبير، موش على كيفك

حديث البوخوخو حطو على حيطك

خلقتني انتي باش تفتي عليا ؟

تعملي بيعة و شرية، صحيح حسن و متوسط

دين سياسة بورصة و معاملات

تلافز ، صحافة و راديونات

تعبي جيابك ببول جمل

دين شوالق، غوفة و قمل.

صلي الجوامع قدامك شكون شد عليك ثنية ؟

و خليني في طريقي ، موزيكة المدينة تحاذي فيا

ما نيش نستفز فيك نحكي من جواجيا

كل نهار بطلعة ، الفحجة بفتوى ،

الضحكة حرمتها عليا.

ديني سؤالي ، نسايس مرتي

نصافح جارتي، اناقش أختي .

خويا هذي تونس و هاذم اماليا

اللغة إلي تحكي بها بصراحة غريبة عليا.

 

devant la menace intégriste progressiste et agaçante, je réagis.

 

 

Zakiya Lysanxia

هزوني لبيتها ، كلوار ضلام، قالولي المريضة تاعبة نقص عليها الكلام. قحبولوجيا لفظية ما عديتهاش:

- كيف هوما مرضى ، نقصو عليهم الرديون إنت و الزملاء ، و اعطيوهم بالوقت الدواء !

مزلت نتكلم ترمات عليا الكازي قتلي: يعطيه بكشة، هزني معاك ، من هالنفية يعطيني هجة ، شاهية قرطاس لوبان بعد العجة، كل  يوم زريقة و مع كل دزة  كشة  . مانيش مهبولة ،  عندي البهتة و التزيليفة ، كلو من إلهام الحجامة و من قوة الركشة . يا حسرة على ايامي كيف كنت ترنكوشة ، حتى من لسعد كريك طمع فيا . خالي ما نحكيوش عليه، يقلي ما تقول لحد. يجيني بالسرقة وجوه الصباح، يحسس و يبسس بالمرتاح، نتقزز نصكلو أمو يزيد يخدم المفتاح .غصة في القلب كبرت بها ، خنقة عايشة معاها . بنت فاميليا أختك ، غير الفاميليا غدرت بيا. يعمبنو إلي يعري في بقعة ما يغطي. يعمبو إلي يحل في الصغيرات فتارية.  يعمبو إلي يبات يسري تحت الغطاء ، يستخايل وسخو ينظاف بالماء. الوقت مقت و الصغيرات يكبرو ما يبراوش.  اش مازالت تنفع حرابش ؟  هزني معاك نعطيك بوسة ، نحرقصلك نشطحلك نحددلك السورية، نعرفك ببنات القسم و بأقوى الكوارجية. أختك نهني ما ترانش في هالتبهذيلة . ما عنديش زهر ،نفذ فيا الوعد ، لازم الوالدة دعات عليا

خالد خويا ما يحبنيش ، يعايرني ما يوايسينيش . يقلي بمنظرك هذا للبيرو ما تجينش . نتعدالو ساعة ساعة ، نعمل روحي ما فيباليش ، إتدزني البلاكة مالباب ،خالد خو  زكية أستاذ مبرز في القانون ،  و النبزة من عند  نادية -بزازل  السكرتيرة ما تراتينش. نولي نتعدى حذا فاروق الحطب ، ولد سبط  يودني ما يعايرنيش . شعلنا سيقارو مريرة ،ضحكني ضحكة صغيرة  حلاتلي التصديرة تبليت .  تعدى الوقت ، والظلم مقت . كان موش في الرازي راني عند أمي في البيت ، مسكرة الباب بشرلية ، يضحكوا عليا إماليا، لا من طل عليا . عيشة حرابش و رندفوات ، برشة حنوشة في المخ ، و ما قعدت صحيبات . طبه جحوشة ما نفعت دوايات . كيف تظلام بيا الثنية نكلم الأستاذ المبرز يعلق عليا ، ولا يعديلي نادية بزازل تتمهزر فيا  . نقول خويا حروجي و صعيب ، يربي فيا . أما يربي فيا علاش ؟ كان بركة يسمعني و إلي بيا . مانيش وسخة ، أختك  مريضة نفسي نية . مزمنة ،مدمنة ، كردونة متروكة ، عملوها فيا . جيعانة للشمس ، مخبية وجهي بن يديا .

يغزرولي يقولو مسيكنة مهبولة ، نهار و طولو في الفرش مسبولة . بنت عايلة خسارتها ، أميمتها زوالية و هي فاضحتها . وليت نسلك فيها نتبسملهم ، ندرغم شفة وحدة بالحمير ، نقول زوز برشة ، وين نعرف عالبلا ، تاو كيف خالي يدورو عليا . قالولو يا خالد شوف حل لختك ! قلتلهم شفتو بالله ، وهو حب يفهم؟ يترومزو عليا . ما عاد فهمت شي ، نحيت دبشي الكل و خرجت عريانة ، الحال شتاء ، العصافر بردانة . أسمع ياللي ما تسمع ، زكية Lysanxia اللطف يا ربي خرجت قلم . لوكان جاو بركة يعرفو ، موش مني ، مالهم .

هزيت روحي وحدي للطبيب ، قتلو دكتور ما عادش انجم ، لا فهمت روحي لا فهمتني لعباد ، إلهام الحجامة قتلي ما عادش تجيني ، فاروق الحطب سكر الحانوت ، وين بش نقبل ؟  غزرلي من وراء مراياتو، ايديه على حناكاتو ، و قالي:

- شوف زكية ، ما نحبش نخبي عليك ، العلم تقدم و الدوايات موجودة . شوية صبر و نشالله عن قريب نوصلو إلى نهاية النفق!

- أما نفق يا وجه الطبق ، إنت زادة تترومز على زكية ؟ دكتور لغتك قصدرية ، بدل عليك هاك السورية ، حبيبة سطمبول هاي جات من ليبيا فليجاتها مليانة ، جيب المدام ويجا حذانا .  سيب علينا من لغة نفق  دكتور  و كلمني بالعربي. أنا مخنوقة ونتي تعمل في الديبلوماسية .

نتلفت نلقى الدكتور سورية هز التليفون . تفاهموا عليا . سكرو عليا في هالبيت ، ونتي شبيك ؟

كيف تخرج نعملك تليفون هز عليا ، اعطيني نومروك 

   زكية نسيتني ما عقلتنش؟ -

- كثر عليا العفس ، سامحني. اعطيني نومروك ،ما تمهمشنيش - 

تلعب عليا الدوخة ، نخرج للكلوار نجري مترهوج ، يعرضني الفرملي يقلي شبيك ، نقلو شي ما بيا ، نسيت زكية . يقلي وسع بالك يا أستاذ ربي يشفيها ، هاي حذانا ما تخافش عليها . .  بربي اش عمتلي في هاك القضية ؟ أستاذ ,  ما تنساش تتعدى على بيرو الدكتورة 

.خوذ الدواء لختك

                                                           * photographie de Nan Goldin

 En hommages à toutes les victimes de l'abus sexuel et du silence complice , 

                         à tous les "psychiatriques" qui se respectent, à Z., NO, M, et H.     

Samia Topkapi .

- سامية علاش ؟

- الدنيا قحبة ما تسواش!  عطاوني ليه بنت 14 ، قتلو يا بابا اليوم عيد وين المهبة؟ قالي عطيتك لراجل، يزيوني مالنهبة.

مشيت معاه ما تبعتوش ، مسني هزني مصني دزني و ما حطني، ما تقطوش  ، كلمني ما عبرتوش، يهز يدو يلصقني علحيط ، نتلفتلو نقلو هنا بديت ، يخرج يقلي العشاء ، يروح يلقى العمى . طردني شطحت بالمحارم ، و لتوى ما قصيت .  في هاك البلاصة كيف تجي غشيرة جديدة ، نمشيلها إنحيلها البيرة ، نحطها في تاكسي نقلها  اخطاك من هالغناية ، أنا مذبية نخليك حذاية عقاب الليل نستوحش ، نتفكر صغري نقوي فالدوزه ،  يرشقو عليا لازم بابا وصاهم عالمهبة . عيشة قحبة ، أيام مدزوزة .

نمشيلها من عشية لعشية ، تقلي نعملك قهيوة بشرط أقرالي كتاب . نقلها سامية هاو نعلمك تقرا خير . تقلي اش نعمل به الحرف والخليقة ضلفة؟  نضحك كالبوهالي ،و كيف نفهم اللقطة نتكى لتالي . تقلي كمل اقرا ، تسخفني الغزرة ، نحل الصفحة نطيح على نقشة ، نقرا و تصرعني ريحة الزهر في القهوة

نذوق مالفنجان و نتبنن ، متعس ربنا نطعمو و ريقتنا تسيل ، و هوما أيامهم حرفة

!  سامية محلاك -

      غادي يقولولي : سامية مغلاك

! ما عادش تمشيلهم -

  نزيدك قهوة ؟

- لا . هات أنا نسربيك .

سامية !!!!

  سامية شبيك سكت؟

سامية وينهم سنيك ؟

سامية وينك ؟

 سامية ما تخلينيش ...تكلم ..سامية علاش ؟

كان جيت نعرف ، هاك البلاصة ما نمشيلهاش...  أيام مدزوزة ،قارو و دبوزة،   الاسئلة ماتعشيناش

                                     *photographie Nan Gloldin.

en hommage à Samia Topkapi, qui existe vraiment, qui ne sait toujours pas lire,ni écrire, n'a pas d'internet, et à qui j'ai arrêté de faire la lecture .
Samia sama7ni , je ne déguste plus vraiment le café. 

7 up ! 7 down !

et pourtant elle tourne, hal khalya .

الثابت عنا ، بعد رؤية الحلال ، و بدخول الغابة و الاستئناس بالزيتونة ، إنو السيد المنضر ثابت الأمين العام للحزب الاجتماعي التحرري إقترح يقترح قرحاً  دستوريا جزئيا يتمثل في إلغاء الشرط العمري يا عمري للترشح لرئاسة الدولة و التمغيط في الولاية الرئاسية إلى 7 سنوات. 

تحيا ال7up الخضراء في تونسنا الخمراء، ضربة ضربة للبوتليس، و ما عد يوقفك عمار و لا بوليس !

و الله لا ينحي شاشية على بوهالية 

L’homosexualité en Tunisie : une réalité « folle » .

أنا مثلي : Je me ressemble .

كيف روحي ، ما نشبه لحد و ما نحبش نشبه لحد . نحب نشبه لصوتي ، لتصويرتي إلي في مخي ما يراها حد ، نحب نشبه لبدني، نحب نمشي ما نتلفتش، نتكلم ما نخممش ,  زعمة فاقو بيا؟

  منين باش نبدا؟ زعمة نوصل ؟ شبيهم عليا؟ ما كلمت حد، و ما يهمنيش يعاشروا نساهم ولا زرزومية . 

أنا ميبون، فينو ، مصور حواجبي بقلم، نغزرلو كيفاش يشرب في قهوتو، يظحكلي، يجينا جلم  . أنا ميبون:  نحب نحجم و نبرفن و نتلفن و نحزق السروال،  نقوي في البافل ،نحرق  الرافل ، نغني   comme ils disent ،و هو غافل،  نقلو يا عشيري ، يقلي ربك أسكت لا يسمعونا ، نزيد نقوي في البافل ، تتعدى أمو ، فاهمة همنا و ساكتة، تقلو بنت خالتك اشبيها حليلتها ؟ ، تتحرق شفايفو ما يلقى ما يقول، نهزو لصدري ، نبوسو ، يبكي و يقلي : علاش أنا ؟

يوفالي الكلام .

حرام .

قالو حرام، مخيب راسها كالعزري، في طفلة كيفها تسكسي ، ما تحشمش و ما تحياش، نخذولها راجل يلمها، الشي هذا ما عناش ! 

نزبين ، ما إخترتش. حبيت نفهم ما وصلتش ، و ما عادش نحب نفهم ، نحب كيفكم نعيش .  نحب نخرج ملخدمة نلقاها ، ناخذها من ايدها ، من غدوة أنا نستناها ، قدام باب دارهم مش في تركينة . إيه يعطينا و يجينا ، أحشيونا فالحبوسات ، يسألونا اش عملتو ، نقولو حبينا ؟

أنا مثلي ، أنا تونسي، أنا دوسي محلول ما حبوش ينظرو فيه  . 

أنا مثلي ، مانيش قطعي ، بو كشطه يحشي فيه . قالوا هذا شرع ربي!  خلقتني إنت، سماك ، باش تفتي عليا ؟   بيني و بين إلي خلقني ما حاجتي باسطة، هدرتكم مسوسة، أفلامكم ماسطة . قراني دنيتي ، ما خطفتش، ما نهبتش، أنا ميبون ونتي زعمة راجل . رجولية مشرية، عذاب القبر من المنصف بي بخمسة ألاف . أنا عشقتي غالية ، دفعت عليها عمري، مش حرام . الحرام تهز يدك على ولية، تعبي فمك بالغرم معى أولادك ، تحرم عليهم التلفزة ونتي تاخو أربعة، و تورث قد الأنثى مرتين . 

 أنا ميبون ، و هي تزبين . نباتو نكتبو في نوتة بنينة ، نلوجو على ايد حنينة . تبات انتي تلوجلي على فتوى ، تحلل و تحرم في شنقه . اخنق روحك ما تخنقنيش . أقعد إقحرلي ، اتعدى و أبصق، ما تكلمنيش. لغتي ساهلة فيها كلمة: حرية ، ونتي  بلادك بعيدة ، تحلم بقزدرية زمزم، و بنكاح الحورية .

انتي مسود جبينك ، لابس باتمان . أنا ماعندي ما نخبي، نخرج عريان . تصلي، اتحي ، تزكي ، أمورك ما مدخلنيش .   علاش تعبدني أنا و مسيب ربك ؟فرهد روحك ، و خليني نعيش !

نمشي كالانثى، نتكلم كالخنثى،مانيش متلوح في شقفة ، هنا قاعد ، قدام باب دارو نستنا فيه : عشيري راجل ، طلامسكم ما تقنعنيش . 

. إتيقا و إستطيقا

التونسي و ذوق الفجل  حاشى الفجل !

في كل مرة نخرج فيها زعمة بش نفرهد ذاتي المترهلة في بعض البلايص نندم و نروح كيف العزوزة الخرنانة : ياخي أنا مطلع و ناقص Zoloft و لا فات فينا الفوت و نفذ فينا الوعد و معادش بش تقوملنا قايمة لقيام عيسى : مناظر حرفا و أذواق منحرفة ما عندها مع ال esthétique حتى علاقة - اللهم بالتناقض- . ياخي إشبيني هكا ؟ ماشالله شبيبة IN :

lunettes branchées  على المقلتين ، شعورات لاصقة بالبصاق ، صبابط مصباح علاء الدين ،دجينات فلسفية، و فستات تركب الوعواشة، تراه جاي من بعيد يسخفك: علاش يا وخي؟ شكون عملها فيك هالعملة الزرقا ؟شكون متشمت فيك و فيا و نصحك بيه هاللوك لعظيم  يا ذوق اللوح ؟ علاش ؟ كيفاش؟ بقداش سومها حصة المازوشية هذي يا عنصر ؟ خليك متفرهد و البس حويجة تناسبك و منظمة ، تمشي فيها مرتاح و تربح فينا ثواب ، ونتي وحدك في خرجة وحدة  تمثل أفلام كوستوريكا إبكلهم ؟ 

و أختنا حيزية تراها في حكاية ترنسندنتلية ملوية ،متحجببة (أمورها ما قلنا شي و مش هذي القضية )  متزبرة متغبرة ، حاله في فتشاتتها الداحس والغبرى ، تزيد تقربلها تلقاها مفوحة بالزرزومية . تاكلك يدياتك على وحيد داودي و رغية صابون تعمللها طلية رعوي .  وين قراوه الفن هذا ؟  ياخي ما يخطيوهمش على هالإخلال بالذوق  العام ؟   شبيها مماتي ما كانتش مرهزة كيفهم هالمنفتحين  إلي "يفهمولها" و يسمعو في نينا سيمون؟  كيفاش ينجم انسان غير مختل التكوين يسمع درويش ينقش و يلبس هكا ؟ قداش يلزمنا من مورستان و هزان برقدان ؟  يراني ما نموتش قبل ما نفهم هالجعفرية هذي . في الانتظار، ما لقيت حتى حل إلا أني ،نصوم الشارع التونسي و نكب راسي في فيلم ولا غناية، و نشلل عويناتي في مماتي ! 

و يرحمك يا Lacan:    

"! Tous à l'asile "

اعذرْ بلادكَ حين تنسى

نحتاج صوتنا

ليمر بنا الحق

و ينهض لنا بين حشائش النسيان

بعض الرفاق

لنستحق الإحتضار.

خائنٌ

لون وجهك

تكرار

ونحن صرنا أرق الأرق

لا نجيد الانتظار

حرائق غيمك 

و عري أحفادك ملطخ بالغبار.

أنا يا من كم أحبك

طفل

و أنت جريمة .

بيني و بينك جوع قديم للبرتقال

و كلام لا يقال...

تربتك صارت عقيمة.

ما عاد فينا

مسافر لا يغرق

عند الفرار

ما عاد لوز على متاهة كفك

ما عاد قلم يصهل

ما عاد ضلع مستقيم

ينازل التيار.

نصف الحقيقة لا تكفي

كي نكبر

و كي نحار .

والسماء والسارق

ألهاكم التكاثر

  حتى زرتم المقاهي

فاحتسينا الأسود

ونسينا القهوة

ربما نرى في وجهنا النادل

بعضاً من النقاء

و نتلو فوق طاولة الرحيل

قُرْآنًا  من البقاء

كيف نقول أننا يوماً كنا ؟

هل لنا ما يكفي من زيف

و من طين ؟

لم يبق في السماء طارق

والبلد خواء

بكينا

و قلنا فلسطين

لا تقلقوا

كل الذين نبادلهم المسخرة

أرق

عابرون نحن

ويبقى الورق.

فهل لنا ما يكفي من فلسطين ؟

لست أدري

ولكني حين أبكي وطني

يدخل جيش بأكمله

إلى الوريد

لا يخرج

كم يلزمنا من وطن..لنحتمل الوطن ؟

كم يلزمنا من تين ؟

وهذا البلد الأمين .

Nous avons le membre: YEDDEK !

غدوة نحرق

بكينا

لأن البكاء لا يليق

 بمن بطونهم خواء

و بقينا

على شفة الطريق

بلا

رداء

لا نسقط

سنسهر

لينهض لنا

من جسد القتيل

زهر وسكر

سنسكر

غداً

بعضنا يسير

و بعضنا ينام 

لا يفيق

وكلنا زورق

لا تحزن

غداً نقول

وغداً نغرق

لأن الكلام لا يليق