لزهر شكبّة

"من سوء حظّيَ أَن الصليب

هو السُلَّمُ الأزليُّ إلى غدنا ! " 

يمشي يتدهشر ، ما يحلالو حتى معشر ، العام أثناش الفم الأبخر والعينين ما تراش . عمرو ما عاشر و كان عاشر راهو عاشر الحيوط ، دنيا زهرّات ، دنيا بخوت ...

لزهر وليدها ، يعمل منها نص ، يحكيلك على العراق  وعالمخبل في كبّة :  حرب الخليج عبد الناصر أم كلثوم والقومية ، يحكي عالنضال والإنسانية ستالين  والشيوعية يزيدها مالوف الوطنية  و يقوم ينوّح كيف الولية كيف يتفكر البطّالة كيفو والهجاجل والمرماجية  ،  تكثر عليه الجوجمة ، يتضرب يتملص ، ويزيدها لص  .... لزهر

مقص ، رد بالك تسلفو ،  ورد بالك ما تسلفوش ، يتكلم برشة لغات أما عمرو ما يحكي بالفلوس ، لزهر ممصوص ... يا لندرى آشنية غلبتو ، لا دار لا امالي ، رد بالك تقول عليه زوالي ، عايش بالشكبّة والقمار ، قرطاس حلوة فليّو يعمل بيه  آفار   ، لزهر عمرو ما يتشكّى ، ديمة صايم ساعات يتعشى ،   دنڨري فوق المريول خلعة ، مشات ناس وجات ناس ، ولزهر كيف ما هو ، قرطاس فليّو و مريول خلعة ، لزهر بلعة

... 

 لزهر زهواني ، كلامو زلعة ، ديمة يضحك تقول عامل بالعاني ،  تجبدلو عالدنيا يڨحرلك  ، يضحك  و  يزيد الولعة يقول :  طريّح شكبة . 

 لزهر توا شهور ، ملي  قالوا ثورة ومظاهرات ، هز حلوة الفليو وتخبّا 

  ...

 

 "لازم تربّى وعمل قلب وولا راجل  " يا راجل أخطاك راهو غاطس في بعض البلعة " " خلى بلاصتو الطحان تو يرجع " " حد ما يعرف وين يسكن ؟ ملا بهبار ، لا نهار ريتو ماخو الكار ، باز كالفار غاطس في بار "مسلفو عشرة آلاف وين سماه ؟"  "صاحبي أخطاك ، نعرف على بلاه ؟ " 

  

 

...

  يدخل الفرخ يجري ، كشاكشو بن شفايفو بالشهقة يهتري :" يا جماعة شفت لزهر في الفايسبوك ، متأكد  هو لزهر ،  لزهر متاعنا ، مريولو لبيض  أحمر دم ، غطاوه بالدنڨري وزادو فوقو العلم   ، ايجاو شوفو لزهر ناكوه الحنوشة ، لزهر  شكبّة مات شهيد بكرتوشة "



لزهر إلي يطيحلو تطلعلو قرعة ، لزهر كيف برشة ملي مشاو ، لزهر ماهوش بدعة ...
ويزيدها لص 

........



 هيا على ريحة لزهر ،   طرح شكبّة ؟  

 ...