بكل حزم نفسيتي هشة

أنا تونسي قالوا نفسيتي هشة ، أنا تاريخ جبان ، أنا البارح طحان ،اليوم مشروع  إنسان . أنا نفسيتي هشة ، خليت الدشرة و خرجت مالقشرة ، نتفزعك بالكرهبة بالبورطابل و السلعة الغشة ،نفرني و نكردي ، عيشة jetable  ، وليت sortable  و نسيت اللهجة . إيييييه ، أنا نفسي هشة ، تلعب بيا الأرياح كيف القشة ، من أرجع غدوة بعت عمري على فيزا و هجة ، أخلاقي عدمت ، نتكلم بالنشة ، نسيت الثقة ، ما عاد نأمن بعشرة . خارج مفجوع ، داخل مخلوع ، نشوف روحي كيف الحشرة ، بلادي كلاتني خلاتني جثة . قريت و زعمة وليت ، permis بالفلوس شريت ، و في الكاباس فما أتعس مني شكبو عليا بالعشرة ، جيت البرة ، عشقت القهوة المرة ، حرقت جواجيا ، حسيت بالغدرة ، ندز في ساقي بالتقراق ، نسرق في الضحكة بالنطرة ،علاقاتي نفاق، عالمزيرية كتبت الصداق ،  إييييه نفسيتي هشة يا عصابة السراق !  إييييه نفسي هشة و تونسنا ولات مورسطان ، إلي يبكي أكثر مالفرحان ، الغارق أكثر مالعوام ،  أنا سيدي بو زيد و سيدي بوزيد أنا، نتكلم نتكلم و نزيد ، البارح أنا جبان و اليوم الحق فينا بان ، اليوم حرية ، موش على كيفكم ، على كيف نفسي الهشة ، على كيف التوانسة و الجمهورية ، على كيف كل ولية بكات ، على جاليتنا إلي تنفات ، على قدرنا إلي تستخايلوه مات . في تونس ما يستحق الحياة ، و بكل حزم ، نقوموا مالردم يزيونا قهر ، يزيونا سكات !!!! 

غدوة غدوة  ننسى ...ننسى إلي فات ... و في بلادي حر نبات