إذا الشعب يوماً أراد الحياة

بلادي بلادي بلادي لك حبي وفؤادي

أنا تونس ، أنا مصر ، أنا الجزائر ، أنا السودان ، أنا سورية ، أنا اليمن ، أنا المغرب ، أنا العلم ، أنا النشيد ، أنا الوطن ، أنا الحرية و أنتم المجازر . رفعتم السلاح ، رفعنا الضمائر.  ألهاكم الكرسي فأهديتم لنا المقابر . كلا سوف تعلمون ثم كلا سوف تعلمون :  وجه الحق دائم و وجه الظلم غابر .

تحبون السيادة حد العبادة ، حد الابادة . مارون ، خائبون ، خاسئون ، خاسرون. تلعنكم الأوطان ، تلعنكم الأحزان ، تلعنكم الأعلام ، تلعنكم الأقلام ، تلعنكم الحياة يا أعداء الإنسان، يا أعداء الألوان و الاكسيجين ، يا عابيدي الكراسي ، يا زارعي المأسي،  يا مسخرة الزمان ، يا مغتصبي الشمس ، قاتلي الأقحوان. باق أنت يا شعب مصر الثائر ،خالد بعد الشهادة بشهادة . غداً عصفور حر سيطير من تونس إلى ساحة التحرير ، و غداً تستحي منهم حتى ديدان المماتة ، و غداً نصر و غداً مصير . و غداً وطن و غداً احراراً نسير .

أنا الدمعة ، أنا النحرة ، أنا الأم الثكلى ،أنا الشرايين الحبلى ، و أنتم المسخرة . أخرجتم الناقة و الخيل ، و نحن فرسان الحق، فرسان الجوع و الفاقة .أنتم الموت و نحن الاستفاقة .  نجيء من جبال خمير ، من سيدي بوزيد ، من النيل ، من  الصعيد ،من السويس ،  نلتحف النشيد ، نرفع الشهيد ، نغطي الرفيق ، نبكي الفقيد، لن نصمت . فنحن الورد ، و نحن اللحن ،  نحن القمر و الياسمين ، نحن القدر و أنتم الجنازة .ليس لنا بعد اليوم من صوت يهفت .

صامدون ، عابرون نحن فوق الدماء ، نفترش الرصيف ، نصبوا الحياة ، حتى الممات ، قلبكم كفيف . مرت بنا السنون نبتلع الشعارات  ، أيامنا متاهات ، ضاقت بنا الصدور ، ها نحن نصرخ بعد السبات .  و اليوم خرجتم دون القناع ، وجهكم سخيف ، و وجهنا عنبر .  هنا نبقى ، هنا نروى ، هنا للحق منبر .

خسئت يا مبارك كما خسئ بن علي ، غداً تنام كضبع خائن ، بوجهك المارد. و غداً ننام نحن في أوطاننا  الجريحة ، تنتصر لنا الأغاني و القصيدة . اليوم شعب ثائر مكلوم صامد ، و غداً  نصرٌ من تونس الحرة  إلى مصر الحبيبة عائد . 

 صوت الحق وحده هو القائد .

نحبك ، و نحب الحب والمحبة .

 

نحبك ، و نحب الحب والمحبة .

نحبك .

نحب نحبك جهار ، و نحب نحبك بالدرقة ،بالسرقة ، بالنطرة ، بالنحرة،  بالشهقة ، بالفلقة ، نحب نحبك و عليك نموت ، و عليك نحار ، نبكي و نغار . نحبك ، سيدي راشد زعمة اش قال ؟  موش الله جميل يحب الجمال ؟ نحبك ، و ما عندي  في ريق نكاح الولدان و أبوال الجمال . نحبك و نحب الحب وإلي حب و إلي عمرو ما تحب إلي بالمحبة تغدر ، وإلي غدوة عالمحبة

يهد جبال

يشق بحر ،

 نحبك نحرق الكتب ، نعلق على صدري حمامة ، ما نربط في راسي عمامة باش يقولوا نظيف ، نحبك نطير بيك ، نبات الليل نغني عليك، نلبسك طيف ، ندفع الطريف ، نحبك بالكيف ، نحبك بالسيف  . قول عليا مرزي ، المحبة فيك تعزي ، ديني في قلبي ، إنت ما خلقتني ، وإلي خلقني وحدو يعرفني . إلي خلقني يحبني . إلي خلقني يتفكرني قوي ، و يتفكرني ضعيف . نحبك ، و أنا في الدنيا ضيف .

نحبك .

نحبك ، نحب المحبة .  نحبك كيف تبدى في إسمي تتهجى ، تنسى القهرة و تنسى حتى اللهجة . نحبك تنسانا البلاد ، و تتمنى الهجة . نحبك ، لقلبك نتمنى  الحجة . قول كافر ، قلبي  عريان ، صدري سافر   .  نحبك ما عندي ما نخبي ،  نحبك بالمحبة نوايا حسنة نعبي . قول خرشي ، راك فيه تحشي ،  سيب عصفور في سماء تونس الحرة ، و شوفو للظلام يرجعشي . نحبك.

نحبك و نحب إلي يخاف يقول نحب ، غطى راسو و إتكب ، كليتوه بعذاب القبر ، دفنتوه قبل اللحود إتسب . نحبك في بلادي هاذي ، نحبك ياسمين و فل ، قرنفل أحمر دم ، وردة نعمة صليحة مسيكة موسيقى استطيقا فيروز والجويني هادي ،  يكفروني الإخوان ، غناياتي هوما خواتي .  قول كافر ، مانيش متحلحز ، قول واطي مكمل بنوتاتي و نزيد نبلبز . نحبك ، نلبسك ، نشربك ، نستناك ، نتخبى فيك ، ما عادش مخبيك ، مع الياسمينة نسقيك ، إمشي هز راسك ، نحاذيك . يا شيخ إرخيك ، دينك politique ، ديني esthétique . يا شيخ  إرخيك ، يزيك مالريق ، غدوة القرنفل ينكر فيك . صلي ، تحي ، زكي ، سيب عليك مالافلام ،  دم الشهداء خاطيك  . الحرام بالدم اليوم تعبي جيابك ، الثورة رزينة على يديك .   

نحبك ، مانيش جافل ،  سيدي الاخوانجي شعب تونس ماهو غافل ، دفع الدم الغالي ، ونتي هابط بالمحافل . وين كنت كيف قتلوا الكلمة ؟ إغتصبوا السماء و النسمة ؟ سيدي الاخوانجي ما حاشتي بالبوخوخو ، تونس هذي كل واحد يستكفى بروحو ، و لا حد يهز صمعة معاه في لحودو . أنا نحب نموت بالمحبة ، نعيش بالمحبة ، نصافح أختي و جارتي ، نعطي للصغيرات في العيد المهبة ، نعلي في الموسيقى ، نحترم المرأة . سيدي الخوانجي ، ما كلاناش كرطوش الثورة باش نبلعوا discours العورة .  

نحبك ، نحب إلي يحب و نحب المحبة . نحبك ، الدنيا كذبة ، علاش تزيدونا عالكذبة كذبة ؟  نحبك ، الدنيا لحظة ، نخطف الضحكة ، ننسى الدمعة ، ديني سؤالي ، قول بوهالي ، نحبو ، نضحكلو و نتعدى . نحبك ، في بلادي الألوان ما عادش تتخبى ، نبينيلك مالكلمة الحنينة قبة ، نصلي عند القصيدة ، نتغطى بالتنهيدة ، سيدي الخوانجي ، بلادك بعيدة ، هذي تونس الحمراء ، تونس الشمس و الحرية ، تدفني بالحياة و تعمل مسرحية ،  نقلك يبطى شوية . 

    

نحبك ، و نحب الحب والمحبة .

نحب الحرية .

 

sinon, YEDDEK

 pour A

ثنية الياسمين منين

حتى  أنا فهمتكم : 

أشبيكم نسيتوا ؟ أشبيكم تخبيتوا ؟ وين مشيتو ؟ زعمة نسيتو ؟ زعمة عييتوا ؟ زعمة شوية بكيتوا ؟

اللعبة كبيرة ، و البلاد صغيرة ، ثورة نحارة ، سياسيين غدارة ، ما تقولوش دغف ، ما تقولوش  إلي تحت الكرطوش تكلم اليوم ضعف ، رانا بحارة ، بحوراتكم غارقة ،  أما فلايكنا جبارة ، ما عاد نحصلو لهاك الصنارة .

جراد يا حشرة قوم إتقعد ، خنارك  على برى ، مزلت تمغط ؟ الشعب إلي لدكتاتور قال : dégage ، ما وصلكش ال message : جراد  يا    sauvage

                                  dégage

هاك إلي متغطي بالشتاء في القصبة ، بصق عالرهبة قال نكمل الثنية ، ما خانش القضية ، قلنا عليهم مرامدية ،عطاونا درس في الوطنية . قلو حكومة إنتقالية ، يا تجمع يا ديموكارتي ، كمل في المسرحية ، هاني خالط مع البوزيدية     .

اشبينا نسينا ؟ زعمة على بعضنا عاودنا كبرنا ؟  فيسع تغطينا ؟ خبينا العلم و إتكينا ؟  لشكون سهرنا ؟ لشكون نواح ليالينا ؟ قداش إتدمرنا ؟ في المظاهرات تمسمرنا ؟ البوليس بالسلاح غدرنا . قداش عطينا ؟ قداش حفينا ؟ تونس اليوم ماهيش حزينة ، الحرية جات بينا تكمل بينا ! قوم إتقعد ، حيي الدشرة قبل ما تحيي المدينة ! 

اشبينا نسينا ؟ قوم تقعد سيب التركينة ، تونس لاهي ليك وحدك ، و لاهي لجهة وحدة رهينة ، تونس لولادنا ، تونس لامواتنا ، تونس للي مشى علينا ،خرجنا من سكاتنا ،   تونس لنوار المدينة ! هز راسك أغزر لخوك ، كمل واصل ، التاريخ هو الفاصل ، كمل عيط يزي مالريق ، أخرج  إجري نقز  زيد إبكي ، تغطى بدرابوك ! فيق ! عاود فيق ! ما تخونش  إلي لحمتو مشوية .

علاش على خويا ندوان ؟ نسمعو الكلام نتخبى وراء الأنانية ، يزيدونا في التنوفيق ،  يضحك علينا الرهدان و متع الولدان !   جايين من البلدان ، وين كانوا وقت البيان و السبعة ؟  وين كانوا وقت الصغيرات ماتوا  بال lacrymogène  ؟ قوم تقعد صون البلاد ، غير عالدم ، حط barricade . قوم تقعد مكش وحدك كيف البارح كيف اليوم كيف غدوة ، ننتقموا للي كلاتلهم قلوبهم الندوى . ما يغلطوكمش بلغة فوضى ، البارح قالوا علينا ارهابيين ملثمين ، اليوم بدلوا الكلمة ، ما تغركمش اللحظة ، ما تنساوش الدمعة ، تونس تستنى فينا ، العالم يحكي علينا ، ترابنا فخور بينا !

أضحك ما عادش خوف ، مس وجهك ، ما عادش مسروق . علي صوتك ،  ما عادش مخطوف !  

يا تونس ولادك مكملين ، يا تونس نعيشو أحرار ،  نموتوا مواطنين !!!  قوم اتقعد وريني تراب البوعزيزي فين  ، قوم إتقعد وريني ثنية الياسمين منين

 

  

وطن و ياسمين

وطن و ياسمين:

وطن و ياسمين على الناس المناضلين ، وطن و ياسمين على عمادات المحامين ، يا أساتذة يا باهين . وطن و ياسمين على الجيش الوطني يديه نظاف مالدم، صان القسم .  وطن و ياسمين على على الأطباء و الأساتذة و العمال و المرماجية و الكواشة و حتى البطالة و إلي هز الدرابو   ، على في الصوت ، قال كليمة و وليدو يموت ، تحت المتراك كرايمو تنين ، وطن و ياسمين . وطن و ياسمين على خواتنا إلي ما يعرفوش انترنات ، إتخباو في الجبولات ، إغتصبولهم الشمس و البنات ، وطن و ياسمين عليك فقري مرزي مرهز و كبير كبير كبيييير ، كلامي عليك يحير . كيف نتفكر الكرطوش و الوحوش و السفاحين ، كيف نتفكر أيام الغدرة و القهر ، و بو وجهين مكمل في الطحين ، وطن و ياسمين عليكم ضخام و انتوما زواولة ، كرطشوكم بالبالة ، نكتو الحالة ، رفعتوا الشهيد ، سرقتو النفس بالنطرة ، تخبيتوا في الجبولة ، وطنيتكم غولة ، وسط حكاياتهم الحولة مواصلين و ماكمش فاهمين . وطن و ياسمين على وليداتنا في المعاهد و المدارس و الكليات ، وطن و ياسمين عليكم البارح رخينا فيكم العين ، قلنا شباب تافه شباب بهيم ، قلتولنا تونس في القلب ، تونس بالوالدين . وطن و ياسمين عليكم كلاكم ال lacrymogène ، بصقتو عالخاين و البيان ، كملتو في المسيرات ، كان موش في الرأس كرتوشة ، في العين دمعات . وطن و ياسمين عليكم وليداتنا، حشمتونا على سنين سكاتنا ، كسرتوا إلي فات ، الكراسة عليكم وطن و ياسمين . وطن و ياسمين على الشهيد ، وقت الرهبة لم الحضبة ،مد  الصدر و الرقبة،  على في النشيد .  وطن و ياسمين عليك أم الشهيد ، ما تبكيش يا الاميمة زغرد هز راسك للسماء ، شوف الشمس تضوي علينا يقين . وطن و ياسمين على كل قطرة مشات منك ليا ، صانت الجمهورية ، خلات قلوبنا حية . وطن و ياسمين عليك اليوم في لحدك متبسم ، بالعلم متلثم ، راجل ما حاجتك بخطابات ، اليوم مدوا وجوههم في التلافز و الاذاعات ، البارح ضميرهم مات ، اليوم مدوا الشعارات ، قالوا  أحنا البلاد ، يدهم واحد واحد ، النصر جابتو الرجالة ، ما جابتو الفشلامة ، هزازٍين الطحين .  وطن و ياسمين علي شعل في لحمو الوقيد ، وطن و ياسمين علي لا يعرف JCC ، و لا يعرف تابلوات ، و لا يعرف بواتات ، و لا يعرف فواياجات ، ناكتهم الميزيرية و الغصرات ، عطاو صدرهم للسلاحات ، باتوا الليل مكافحين ، وطن و ياسمين عليكم كلامكم رصين ، قلبكم حنين ، ما حاجتكم بتوسيم و بتأبين ، وطن و ياسمين عليكم المناضلين الحقانيين ، عراية قراية ، بتونس متغطين . وطن و ياسمين عالمغبون في الخارج ، تحب تروح لاماليك ، لا حب النوم يجيك . وطن و ياسمين على الكواشة ، عالخضارة، عالفلاحة ، عالشهارة ، حليتو للمحتاج البيبان ،  وطن و ياسمين عليكم انتوما الشعراء ، انتوما الفنانين .   وطن و ياسمين عالمستقنع ، خبز  و ماء و لا للطحين . وطن و ياسمين على المرأة التونسية ، نوارة الجمهورية ، قالوا بناتنا فاسدين ، اليوم التونسية عطات للعالم درسين: تونس برجالها هذي واحد ، و تونس بنساها هذي ثنين .   

    

وطن و ياسمين على التونسي المنتصر ، فلابد للقيد أن ينكسر ،  و لو بعد حين

وطن و ياسمين علي بكاني بكفاحو ، خبزتو سلاحو ، نسى  نواحو ، شمر اليدين ،  وطن و ياسمين عليك يا شعب تونس الخشين . 

Dégage: Promotion Made In Tunisia .

يدكم !

يدكم قلتهالكم والسكات فينا معشش . يدكم قلتهالكم والحاكم الكلب فينا يكرطش ! يدكم قلتهالكم و كنت نحس في الحبس يغزرلي ، نشيدنا كان مغشش  ، حرقت الخوف ، بسقت عليكم و عالمخير فيكم ، بوعزيزي خلالي وصية. الخوانجي الطحان قال ميبون ، أنا و بنت طراد وصحابي  والبقية وريناكم الرجولية  !  كلمتنا وحدة ، تحيا الجمهورية ! 

يدكم يا نهابة ، يدكم يا لحاسة ، يدكم يا قوادة ، يدكم يا سفاحين ، يدكم يا قمل الزين ، الله لا ترحملكم والدين ! اليوم جاي من دفينة ، عندي ليكم كلمة حنينة : يا تونس ما أحلى ترابك ، وليداتك هوما خطابك ، يباتوا الليل يعسو عليك ، كلاب الهارب ينهشو فيك، وين الهربة يا سفاحين ؟ دم القهرة من وراء الكرسي والكرطوش خرجلك اليوم ، رجالك يا تونس متحدين .  يا تونس يسلم درابوك ، يا تونس اليوم نبكي شهيدك ، نعاود نبني قرميدك ، يا تونس ما أحلى  الياسمين يواسي فيك ، البوعزيزي مالقمرة الفوق يحيي فيك ، يا تونس ما أنظف بناتك ، يا تونس ما أشرف وليداتك ،  يا تونس ما أروع ثوارك ، يا تونس كويتنا بنارك ، واليوم بيك متدفين !!  

أنا يا طحان يا شين الهاربين ، أنا إلي نفسيتي هشة ، طيرتك ب Dégage كيف القشة ، أنا الملثم يا رمز ، أنا المتكلم ، أنا العلم ، أنا الوطن ، أنا البوعزيزي ، أنا سيدي بوزيد ، في بلادي مع جيراني نبنيو ، ونتي يا سفاح مطرد ، على وسخك الجرايد يحكيو ! أنا التونسي الحقاني ، أنا إلي ضلمك كواني ، مسيب كلابك قداكش بهيم ، إلي ما خافش من النار ما عاد يوقفو قناصة هزازة طحين .  يدك يا مرهز ، يدك يا خاين يا زكيم ! يدك !  والديك يحشموا بيك ،محمد ولدك أحكيلو على محمد البوعزيزي ، مرتك الحجامة ناكتتك محلاها فيك !   

يا طحان يا بوليس ، يدك يا بيوع ، وين باش تخبي وجهك من ولدك ، وين باش تخبي وجهك من الدم !!! يا جيش يا غالي ، يحيا الوطن ، يحيا القسم !

يدكم يدكم يدكم ، نحنا نباتوا في تونسنا ، انتوما كيف الجرابع تباتو في الغرم ! حاربناكم بالقلم ، حاربناكم بالعلم ، و بالعلم .

خواتي يا غالين ، قداش من ليلة بتنا ساهرين بردانين ، خواتي يا غالين قلتلكم غدوة تونس تبرى ، خواتي يا غالين قداش نحبكم ، قداش نوصيكم على غدوة ، خواتي يا غالين الخوانجي كيفو كيف الزين ، خونة جيفة يستناو في الزلقة ، يدك يا غنوشي يا واطي ، وين كنت سيادتك والكرطوش يخيط بيناتنا ؟ وين كنت كيف اغتصبوا بناتنا ؟ وين كنت والشباب تحت المتراك ينين ؟ يدك يا سافه ، ديني في قلبي ، هز ربك ، ربي أنا هو الجمهورية ، ربي أنا هو الدم إلي تزرزق ، ربي أنا هو البدن إلي في المظاهرات إتدهدق ، ربي أنا هو المخاخ إلي ريناها في القع حرية تنطق ! طير يا رمز ، dégage اليوم عاملة promotion   ،   

made in Tunisie !  

تحيا تونس حمراء حرة  ، تحيا تونس اليوم بدات تبرى ، تحيا تونس 2011, 2020 ،  2200 ... تحيا تونس ، مشموم ياسمين على أرواح الميتين ! تحيا تونس مشموم ياسمين عالتوانسة الضخام المتحدين ! تحيا تونس للعالم عطات درس : إلي يعفس على شعب ، يبيتو في الترهيب و الرعب ، يدز باب التاريخ ، بالدم ، بالقلم ، بالعلم ، بالوطنية ، بالناس المرزية .  تستخايلو قتلتونا بالسلاح ، قتلناكم

بالحب ،   بالحرية

 

(RCD : YEDDEK)       

فلا عاش في تونس من خانها

 

 

يعمبو تونس 7 ، و يعمبو المفتي و يعمبو الجيش الماهوش وطني ،يعمبو البوليس يكرطش ما يقيس ، يعمبو الخاين إلي ولد بلادو ماهو صاين ، يعمبو القهر و المحاين ، يعمبو إلي مزال يبندر ، و إلي مزال يصنصر ، و إلي فمو مسكر ، يعمبو الشرطة و العسكر ، يعمبو السارق ، يعمبو الهم إلي اولادنا حارق ،   يعمبو الفنان الساكت ، و يعمبو الثقافة و الكتب إلي قريتوها ، يعمبو الجمعيات ويعمبو الكورة و يعمبو إلي كلاوولنا ارزاقنا بالغورة ، يعمبو إلي دز وليداتنا للبحورة ، يعمبو إلي يكرطش على لحمنا أناثي و ذكورة !! تحيا تونس حرة بعبادها ، تحيا تونس تضحي باكبادها ، تحيا تونس !!!! تحيا تونس !!!!!! تحيا تونس !!!!!!!!! تحيا تونس !!!!!!!!!!! فلا عاش في تونس من خانها ! تحيا تونس و ليسقط إلي ضميرو مومس ، تحيا الجثة عنبر ، تحيا الكلمة في الظلم تنحر ، تحيا الدمعة تقطع فينا ، تحيا الأميمة هازة كبدها في الدفينة ، يعمبو الخاين يعمبو الساكت فينا !    يعمبو إلي هازز مقرونة ، و قلوبنا ممحونة ، يعمبو الرهدانة ، عساكر الكردونة ، يعمبو الصحافة بالجبن أوراقها مدهونة ، يعمبو عمار و بو تلفزة العار ، يعمبو المراكز معتقلة الكلمة ، يعمبو المرزي إلي مكمل في الكذبة ، يعمبو الرشوة و النهبة و السبعة ، يعمبو  البنفسج و القزوردي ، يعمبو الضمير الفاجر، يعمبو إلي بأمواتنا يتاجر   !! تحيا تونس حرة حمراء  ، تحيا تونس غدوة تبرى !

 

 

عيشة بروكسي

عيشة بروكسي

و ناس عالكرسي سنين تمسكي ، عمار بيناتنا 24/24 مرسكي ، ناس في الهم تكسكي ، سيدي بوزيد عريان ، سيدي بو زيد موش مكسي ، الموتى والزغاريد أكثر مالكسكسي ،

الضحكة بالشهقة ، الألوان بالدرقة ،  الكلمة بالفلقة ، أقصى طموحنا الحرقة ،حرية ببروكسي ،جمهورية في ولادها تعزي ،  شباب الغرقة ، دفنتو الغبرة ، يتكلم بالعبرة ، بلعتو الهدرة . الخير خلانا ، تلفزتنا عاملة مغناها ، الغير يعدي في بكانا ، فدينا شعارات رهدانة ، ما عاد فينا ناس فنانة ، إلي سرقنا أكثر ملي دفانا ،يا ضالم ما عادش نسمع فيك ، غدرتك اليوم دارت عليك ، حط بروكسي نجي نتفرج فيك ، بيني و بينك البيان ، يا حسرة كيف كنت زعمة مزيان ، حليتلنا في البحر بينان ، تكلم البحر لقيناه أكثر منا جيعان ، بلع القراية ، بلع ساقين الحفاية ، الموجة فهمت الحكاية ، رماتنا للنار عرايا . 

عيشة بروكسي ، الضحكة تفسكي ، وجوهنا تمحات ، اشتهينا القبورات ، كبرت فينا الفروقات ، حسدنا بعضنا ، نسينا قدرنا ، هزينا الفرانات ، هربت بنا فرسة ، لقفتنا العرصة ، تكسرت الخرافات . 

        تجي تحسب ما تلقى ، كلاونا بالسرقة ،  ديناري لا تشعل  ناري ، كلماتي هوما ثواري ، درابونا ياخولي بثاري .  ما عادش ساكت ، نموت بكلمتي ، نتصالح مع همتي ، خليك مخبي وراء الكرسي و البروكسي ، أنا اليوم واقف ، على عمري  ساخف ،  أخطفني مانيش وحدي ، اقتلني نضحكلك في لحدي ، خليك مواصل ، أنا و هو و إنت في التاريخ فاصل ، فليحيا الانسان 

و لتحيا الجمهورية