نحبك ، و نحب الحب والمحبة .

 

نحبك ، و نحب الحب والمحبة .

نحبك .

نحب نحبك جهار ، و نحب نحبك بالدرقة ،بالسرقة ، بالنطرة ، بالنحرة،  بالشهقة ، بالفلقة ، نحب نحبك و عليك نموت ، و عليك نحار ، نبكي و نغار . نحبك ، سيدي راشد زعمة اش قال ؟  موش الله جميل يحب الجمال ؟ نحبك ، و ما عندي  في ريق نكاح الولدان و أبوال الجمال . نحبك و نحب الحب وإلي حب و إلي عمرو ما تحب إلي بالمحبة تغدر ، وإلي غدوة عالمحبة

يهد جبال

يشق بحر ،

 نحبك نحرق الكتب ، نعلق على صدري حمامة ، ما نربط في راسي عمامة باش يقولوا نظيف ، نحبك نطير بيك ، نبات الليل نغني عليك، نلبسك طيف ، ندفع الطريف ، نحبك بالكيف ، نحبك بالسيف  . قول عليا مرزي ، المحبة فيك تعزي ، ديني في قلبي ، إنت ما خلقتني ، وإلي خلقني وحدو يعرفني . إلي خلقني يحبني . إلي خلقني يتفكرني قوي ، و يتفكرني ضعيف . نحبك ، و أنا في الدنيا ضيف .

نحبك .

نحبك ، نحب المحبة .  نحبك كيف تبدى في إسمي تتهجى ، تنسى القهرة و تنسى حتى اللهجة . نحبك تنسانا البلاد ، و تتمنى الهجة . نحبك ، لقلبك نتمنى  الحجة . قول كافر ، قلبي  عريان ، صدري سافر   .  نحبك ما عندي ما نخبي ،  نحبك بالمحبة نوايا حسنة نعبي . قول خرشي ، راك فيه تحشي ،  سيب عصفور في سماء تونس الحرة ، و شوفو للظلام يرجعشي . نحبك.

نحبك و نحب إلي يخاف يقول نحب ، غطى راسو و إتكب ، كليتوه بعذاب القبر ، دفنتوه قبل اللحود إتسب . نحبك في بلادي هاذي ، نحبك ياسمين و فل ، قرنفل أحمر دم ، وردة نعمة صليحة مسيكة موسيقى استطيقا فيروز والجويني هادي ،  يكفروني الإخوان ، غناياتي هوما خواتي .  قول كافر ، مانيش متحلحز ، قول واطي مكمل بنوتاتي و نزيد نبلبز . نحبك ، نلبسك ، نشربك ، نستناك ، نتخبى فيك ، ما عادش مخبيك ، مع الياسمينة نسقيك ، إمشي هز راسك ، نحاذيك . يا شيخ إرخيك ، دينك politique ، ديني esthétique . يا شيخ  إرخيك ، يزيك مالريق ، غدوة القرنفل ينكر فيك . صلي ، تحي ، زكي ، سيب عليك مالافلام ،  دم الشهداء خاطيك  . الحرام بالدم اليوم تعبي جيابك ، الثورة رزينة على يديك .   

نحبك ، مانيش جافل ،  سيدي الاخوانجي شعب تونس ماهو غافل ، دفع الدم الغالي ، ونتي هابط بالمحافل . وين كنت كيف قتلوا الكلمة ؟ إغتصبوا السماء و النسمة ؟ سيدي الاخوانجي ما حاشتي بالبوخوخو ، تونس هذي كل واحد يستكفى بروحو ، و لا حد يهز صمعة معاه في لحودو . أنا نحب نموت بالمحبة ، نعيش بالمحبة ، نصافح أختي و جارتي ، نعطي للصغيرات في العيد المهبة ، نعلي في الموسيقى ، نحترم المرأة . سيدي الخوانجي ، ما كلاناش كرطوش الثورة باش نبلعوا discours العورة .  

نحبك ، نحب إلي يحب و نحب المحبة . نحبك ، الدنيا كذبة ، علاش تزيدونا عالكذبة كذبة ؟  نحبك ، الدنيا لحظة ، نخطف الضحكة ، ننسى الدمعة ، ديني سؤالي ، قول بوهالي ، نحبو ، نضحكلو و نتعدى . نحبك ، في بلادي الألوان ما عادش تتخبى ، نبينيلك مالكلمة الحنينة قبة ، نصلي عند القصيدة ، نتغطى بالتنهيدة ، سيدي الخوانجي ، بلادك بعيدة ، هذي تونس الحمراء ، تونس الشمس و الحرية ، تدفني بالحياة و تعمل مسرحية ،  نقلك يبطى شوية . 

    

نحبك ، و نحب الحب والمحبة .

نحب الحرية .

 

sinon, YEDDEK

 pour A