وطن و ياسمين

وطن و ياسمين:

وطن و ياسمين على الناس المناضلين ، وطن و ياسمين على عمادات المحامين ، يا أساتذة يا باهين . وطن و ياسمين على الجيش الوطني يديه نظاف مالدم، صان القسم .  وطن و ياسمين على على الأطباء و الأساتذة و العمال و المرماجية و الكواشة و حتى البطالة و إلي هز الدرابو   ، على في الصوت ، قال كليمة و وليدو يموت ، تحت المتراك كرايمو تنين ، وطن و ياسمين . وطن و ياسمين على خواتنا إلي ما يعرفوش انترنات ، إتخباو في الجبولات ، إغتصبولهم الشمس و البنات ، وطن و ياسمين عليك فقري مرزي مرهز و كبير كبير كبيييير ، كلامي عليك يحير . كيف نتفكر الكرطوش و الوحوش و السفاحين ، كيف نتفكر أيام الغدرة و القهر ، و بو وجهين مكمل في الطحين ، وطن و ياسمين عليكم ضخام و انتوما زواولة ، كرطشوكم بالبالة ، نكتو الحالة ، رفعتوا الشهيد ، سرقتو النفس بالنطرة ، تخبيتوا في الجبولة ، وطنيتكم غولة ، وسط حكاياتهم الحولة مواصلين و ماكمش فاهمين . وطن و ياسمين على وليداتنا في المعاهد و المدارس و الكليات ، وطن و ياسمين عليكم البارح رخينا فيكم العين ، قلنا شباب تافه شباب بهيم ، قلتولنا تونس في القلب ، تونس بالوالدين . وطن و ياسمين عليكم كلاكم ال lacrymogène ، بصقتو عالخاين و البيان ، كملتو في المسيرات ، كان موش في الرأس كرتوشة ، في العين دمعات . وطن و ياسمين عليكم وليداتنا، حشمتونا على سنين سكاتنا ، كسرتوا إلي فات ، الكراسة عليكم وطن و ياسمين . وطن و ياسمين على الشهيد ، وقت الرهبة لم الحضبة ،مد  الصدر و الرقبة،  على في النشيد .  وطن و ياسمين عليك أم الشهيد ، ما تبكيش يا الاميمة زغرد هز راسك للسماء ، شوف الشمس تضوي علينا يقين . وطن و ياسمين على كل قطرة مشات منك ليا ، صانت الجمهورية ، خلات قلوبنا حية . وطن و ياسمين عليك اليوم في لحدك متبسم ، بالعلم متلثم ، راجل ما حاجتك بخطابات ، اليوم مدوا وجوههم في التلافز و الاذاعات ، البارح ضميرهم مات ، اليوم مدوا الشعارات ، قالوا  أحنا البلاد ، يدهم واحد واحد ، النصر جابتو الرجالة ، ما جابتو الفشلامة ، هزازٍين الطحين .  وطن و ياسمين علي شعل في لحمو الوقيد ، وطن و ياسمين علي لا يعرف JCC ، و لا يعرف تابلوات ، و لا يعرف بواتات ، و لا يعرف فواياجات ، ناكتهم الميزيرية و الغصرات ، عطاو صدرهم للسلاحات ، باتوا الليل مكافحين ، وطن و ياسمين عليكم كلامكم رصين ، قلبكم حنين ، ما حاجتكم بتوسيم و بتأبين ، وطن و ياسمين عليكم المناضلين الحقانيين ، عراية قراية ، بتونس متغطين . وطن و ياسمين عالمغبون في الخارج ، تحب تروح لاماليك ، لا حب النوم يجيك . وطن و ياسمين على الكواشة ، عالخضارة، عالفلاحة ، عالشهارة ، حليتو للمحتاج البيبان ،  وطن و ياسمين عليكم انتوما الشعراء ، انتوما الفنانين .   وطن و ياسمين عالمستقنع ، خبز  و ماء و لا للطحين . وطن و ياسمين على المرأة التونسية ، نوارة الجمهورية ، قالوا بناتنا فاسدين ، اليوم التونسية عطات للعالم درسين: تونس برجالها هذي واحد ، و تونس بنساها هذي ثنين .   

    

وطن و ياسمين على التونسي المنتصر ، فلابد للقيد أن ينكسر ،  و لو بعد حين

وطن و ياسمين علي بكاني بكفاحو ، خبزتو سلاحو ، نسى  نواحو ، شمر اليدين ،  وطن و ياسمين عليك يا شعب تونس الخشين .