فُكْ يِزّي عِف

 

 

الياسمين مغشِّشْ
و الدرابو محشِّشْ
إلّي جاي يفرفشْ
إلّي جاي يشبرشْ
البهامة تكرطشْ
و البرد فينا الكل يخبِّش
نحب نطمِّنْ قلبي، ما حبِّشْ


كل واحد يتفلسف
وكل واحد يهلوس
الخرم يوسوس
لا واحد منجِّم يتنفِّسْ
كول و رفِّس
إتعدّى و عفِّسْ
 أضرب ، كسِّر ، وزيد إتبهنِسْ
نحب نرَتّح مُخِّي، ما حبِّسْ

فُكْ يِزّي عِف
ما تضرب الحُرِّية بكفْ
فُكْ يِزّي عِف
خلِّي الدم يكِفْ
فُكْ يِزّي عِف
قوم لتونس شِد الصف
إتفكِّر النشيد، أقعر هاك الدُّف
إتفكِّر الشهيد، إتفكِّرإلِّي عُمرو ما ضعُف
إتفكِّر إلِّي عُمرُو ما سخِف
عالبيان كذِب و حلِفْ
فُكْ يِزّي عِف
لا يقولُو علينا دْغُف

يِزِّي يِزِّي يِزِّي
و فُكْ عِفْ
نحِب نطمِّن قلْبي
نكِمِّلْ بشرفْ

نحب نفرح بيك و بيَّا
آش هالقرف ؟
جيت نطمِّن في قلبي
 قلبي عْرِف

 

 

فُكْ يِزّي عِف

قداش ؟

قداش تعرينا وقداش  تغطيتو ؟

قداش جعنا و قداش كليتو ؟

قداش رينا وقداش عميتو ؟

قداش سمعنا ، وقداش طرشتو ؟

قداش تنفينا وقداش بنيتو وعليتو ؟

قداش حفينا وقداش مضيتو ؟  

قداش سكتنا و قداش غنيتو ؟

قداش داوينا ، وقداش كويتو ؟

قداش صبرنا ، وقداش كملتو ؟

قداش بلعنا ، وقداش بصقتو ؟

قداش سامحنا ، وقداش عاودتو ؟

قداش شهقنا ، وقداش ضحكتو ؟

قداش تشنقنا ، وقداش جنحتو ؟

قداش سرقتوا ؟؟ قداش كذبتو  ؟

قداش من جيب عبيتو  ، و  قداش من جيب فرغتو ؟

قداش من حلمة كسرتو ؟ 

قداش من ضحكة قتلتو ؟

قداش من نوارة مرمدتو ؟

قداش كبرتو ؟

و قداش نسيتو ؟

قداش كفرتو ؟

قداش منا ، وقداش قلتو موش منكم ؟

ليبيا سامحني

ليبيا سامحني ، ما لقيت ما نقول 

ليبيا سامحني ، كلاك  الغول

ليبيا سامحني ، قلبك مغدور

ليبيا سامحني ، دمك مهدور

ليبيا سامحني ، ما لقيت ما نحكي

ليبيا سامحني ، نوارك يبكي 

ليبيا سامحني ، الكلام بخيل

ليبيا سامحني ، الكلام ذليل

ليبيا سامحني ، مات الضمير

ليبيا سامحني ، صوتك في بير

ليبيا سامحني ، هجرك الطير

ليبيا سامحني ، نتكلم نحير

ليبيا سامحني ، الدم سخون

ليبيا سامحني ، تكسر العرجون

ليبيا سامحني ، النفس مرهون

ليبيا سامحني ، صوتك  مدفون

ليبيا سامحني ، الثنية ضلام

ليبيا سامحني ، خانني الكلام 

ليبيا سامحني ، السكات حرام

ليبيا سامحني و كمل

ليبيا سامحني زيد استحمل

ليبيا سامحني الحرية لقدام

 

ليبيا

 

سامحني

 

 

 

 

 

سيدي ربي وأنا حر

سيدي ربي و أنا حر . سيدي ربي ،  نتذكر الجيعان  نصوم رمضان ، ما نذوقش لجاري المر ، نسكر ، نزكي ، نصلي ، و كي يخطرلي ما نصليش ، قول  خر طر ، أنا تونسي ،ما على باليش ، بفلوس السرقة منربيش الريش ، نحب نسهر ما نتعدى على حد ، نتفقد المحتاج راقد في الصرد ، ديني التبسيمة ، و ربي يزورني ديمة ، ما حاجتي باسطة ، ربي كبير و لغتكم ماسطة ،  سيدي ربي وأنا حر .

سيدي ربي و أنا حر ، نصون الولية ، سافرة مرزية ، قولوا فاجرة ، ملا رجولية ،  تضربها بكف ، تلبسها شكارة ، تخرجها سواد ، على جبينك أمارة ، سيدي ربي ، ما ينساها ، سيدي ربي ما حاجتو بمسرحية ، إلي بكاها غدوة يعشاها ، سيدي ربي وحدو عندو دواها ، وهي حرة ،  وأنا حر .

سيدي ربي وأنا تونسي حر ، جاري يهودي نتعشى حذاه ، في الكرهبة نعلق سبحة ، في المكتبة عندي ستين حزب ، ما نحلش على خاطر الدين حرب ، ما حجيتش ومانيش ننقب في الأرض ، جاري مسيحي نحب غناه ، نتفرج في الماتش حذاه ، محبة الأخر فرض ، وهو حر وأنا حر .  

سيدي ربي وأنا حر ، اليوم دنيا ، غدوة قبر ، ما نهز حاجة معايا ، ننبش عالضحكة بالضفر  .  سيدي كبير وأنا صغير  ، نخمم نتكلبس نقيس نفكر نحير ، نحيي النوار ، نحيي الأشجار ، ولي ما تعدى على صغار ، ولي يسايس الكبار ، ولي عالزوالي ما كسر فخار ، نحيي إلي على بلادو يغير ، ونحيي الطير ، ما نحيش إلي علإختلاف نحر الغير .

سيدي ربي وأنا حر 

Dorra String

درة وينك ؟

-الخوانجية شمعوا البلاصة .تبلوكينا ، أول مرة حد يخمم فينا . كنا منسيين ، بين الحيوط الخايخة منفيين ، هاو جاو الخوانجية عملوا جعفرية ،كتبوا عالحيوط كلام صعيب ، وجعني خاطري ،  روحت للبلاد . موش مشكلة ، من صغري كارهة العباد . عييت ، في هاك النفية تخبيت .أنا من هاك العام فاجرة ، أشبيني اليوم قضية وليت ؟

- درة شنوا باش تعمل ؟ فاش كنت تعمل ؟

- كنت نخدم . نقدم و نخبش و ننقم ، عمري ما نصدق ، عمري ما نلحم  . كنت كل نهار نحيا و كل نهار نموت ،نسكر ، ما نكسرش و ما نسرقش و ما نخطفش ، عمري هو المخطوف . مكتوب ، والفقر كافر ، و أنا ما نتوب .   يحكيو عالثورة ؟ و نحنا من صغرنا  كورة بين الذكورة ، ندفعو في الزبلة والخروبة و ال26-26 .عرايا قرايا ، ما عناش فيس . وجه واحد ، والسعد الراقد . تتفتح لشكون ، يا ورد الليمون ؟

- درة علاش ؟

- خدمة الحارزة ما نجمتهاش . هجيت مالدار بنت 14 . لعبت بيا الاحناش . نهار نتعشى و نهار ما فماش . كلاتني المادة ، قصيت قصاص .  خليني ساكتة .

- درة تكلم !

- علاش باش نسكت ، و علاش باش نتكلم ؟ الشعارات ما تعشيناش ! نسيت الكلام . و نساني الكلام . و نساتني التلافز و الجرايد و نساتني الشمس و قهوة الصباح  و نساني الزهر مع الرمان، نساتني الخطوة لقدام ،  و نهشتني الأفام . علاش باش نتكلم ؟  أنا قحبة ، و الدنيا قحبة .... الدنيا أفلام .

- درة اش باش تعمل ؟

- زعمة أنا البارح اخترت باش غدوة نختار ؟   موش الانتحار عار ؟ هاني عملت للعار كار ، و تكلبصت ، ياما شديت السبيطار ! سكرت الكارتي و سكرت البار ، كمل أعمل أفار ، و سكر فم الفقر و الميزيرية و الدمار . خايف من وجهك و وجه سكاتك ؟ كلامك ولا كلام سيادك ؟ أنا وجهي خبشتو و ما خبيتوش ، ما تمدش عليا صياتك ، جيت إمخر ، بطلت الخدمة .

يعمبو إلي يتمرمد عاللقمة

  .     .   

كلمات

كلمات

كلمات ، زعمة كلي مات ، و لحيمتو تشوات ، غصتو في قلبو ، جواجيه في بلاد الدموع تنفات ، كيف إلي أوراقو تكشفوا ، تاجر بالكلمات ،تلون بألف لون ،بدل الشعارات ، و شعارو الحقاني هتافات ؟  زعمة كلي مات ، عالحق مات ، عالكرامة مات ،عالخبزة مات ،  إنسان عاش و إنسان بات ، فاق مالنوم ، عدا بيناتنا يوم ، مهموم ، مظلوم ،تحت جبل الهم مغموم ، مد صدرو للسلاح ، قال الكلمة ، كسر حيوط الظلمة ،رهين الكلمة مشى فتفات ، ومات ...مات ...مات ...

كلمات...  كلي مات ،  كلي عالثورة ضبوعة ترمات ، ضميرو موش ماليوم ، مالبارح مات ، عايش في سبات ، يقششق في الحناك ، يقلب في الفيستة ، يعشق اللغات ، عميل السكات ، مومس الكلمات  . 

كلمات ، زعمة كلي مات ، بدمو الجمهورية تبنات ، بصوتو المسروق الحرية بيناتنا تعلات ، الكرامة بيه رجعت و بدات ،  كلي جاي مالتالي يعيط أنا زوالي ، مناضل ، خدمت الوزارات ، ضاع بين اللهجات ،حسب روحو تاب  ، عالثورة جاي ينطر في ثواب ،  تبعثرت بيه الحسابات ، تضحك عليه الكلمات . مات ...مات ...مات ...

كلمات

كلمات ، و الكلمة سلاح ، الكلمة حق ، و الكلمة ما هي حكر لحد .  كلمات ،  قالوا 2011 سنة الشباب ، شفنا الكفر شفنا الإرهاب ،كسرنا إلي فات ، فسخنا البيان ، نسينا العذاب ،قلعنا التصاور  ، بدينا وحدنا الكتاب و دخلنا التاريخ مالباب .  

كلمات .  لا موش كلي مات ، عالكلمة مات ، عليك و علي مات ، على الكار في وقتها مات ، على الجريدة الموش مصنصرة مات ، على ديبلوم الحق مات ، على أرض الوطن باش ما يموتش في شقفة مات ، على إلي تنفى في المرمات و في البالانسيات و في المعامل مات ،  على ولادنا مات ، على تفاحنا و زيتوننا و مدارسنا و شرفنا مات ، على تونس الحرة مات ، على  تونس متاع غدوة مات ، عالكلمة ، بالكذبة مات ،   كلي جاي بعد سبات يقول على هذه الأرض ما يستحق الحياة ، و هو مات ...مات ...مات ...

كلمات ...كلمات ...و كذبات

 

  

إذا الشعب يوماً أراد الحياة

بلادي بلادي بلادي لك حبي وفؤادي

أنا تونس ، أنا مصر ، أنا الجزائر ، أنا السودان ، أنا سورية ، أنا اليمن ، أنا المغرب ، أنا العلم ، أنا النشيد ، أنا الوطن ، أنا الحرية و أنتم المجازر . رفعتم السلاح ، رفعنا الضمائر.  ألهاكم الكرسي فأهديتم لنا المقابر . كلا سوف تعلمون ثم كلا سوف تعلمون :  وجه الحق دائم و وجه الظلم غابر .

تحبون السيادة حد العبادة ، حد الابادة . مارون ، خائبون ، خاسئون ، خاسرون. تلعنكم الأوطان ، تلعنكم الأحزان ، تلعنكم الأعلام ، تلعنكم الأقلام ، تلعنكم الحياة يا أعداء الإنسان، يا أعداء الألوان و الاكسيجين ، يا عابيدي الكراسي ، يا زارعي المأسي،  يا مسخرة الزمان ، يا مغتصبي الشمس ، قاتلي الأقحوان. باق أنت يا شعب مصر الثائر ،خالد بعد الشهادة بشهادة . غداً عصفور حر سيطير من تونس إلى ساحة التحرير ، و غداً تستحي منهم حتى ديدان المماتة ، و غداً نصر و غداً مصير . و غداً وطن و غداً احراراً نسير .

أنا الدمعة ، أنا النحرة ، أنا الأم الثكلى ،أنا الشرايين الحبلى ، و أنتم المسخرة . أخرجتم الناقة و الخيل ، و نحن فرسان الحق، فرسان الجوع و الفاقة .أنتم الموت و نحن الاستفاقة .  نجيء من جبال خمير ، من سيدي بوزيد ، من النيل ، من  الصعيد ،من السويس ،  نلتحف النشيد ، نرفع الشهيد ، نغطي الرفيق ، نبكي الفقيد، لن نصمت . فنحن الورد ، و نحن اللحن ،  نحن القمر و الياسمين ، نحن القدر و أنتم الجنازة .ليس لنا بعد اليوم من صوت يهفت .

صامدون ، عابرون نحن فوق الدماء ، نفترش الرصيف ، نصبوا الحياة ، حتى الممات ، قلبكم كفيف . مرت بنا السنون نبتلع الشعارات  ، أيامنا متاهات ، ضاقت بنا الصدور ، ها نحن نصرخ بعد السبات .  و اليوم خرجتم دون القناع ، وجهكم سخيف ، و وجهنا عنبر .  هنا نبقى ، هنا نروى ، هنا للحق منبر .

خسئت يا مبارك كما خسئ بن علي ، غداً تنام كضبع خائن ، بوجهك المارد. و غداً ننام نحن في أوطاننا  الجريحة ، تنتصر لنا الأغاني و القصيدة . اليوم شعب ثائر مكلوم صامد ، و غداً  نصرٌ من تونس الحرة  إلى مصر الحبيبة عائد . 

 صوت الحق وحده هو القائد .