أنا الكِلمة ، أنا الكِذبة ، أنا الحِلمة
أنا اللحم ، أنا السكّينة
أنا أوّل فرحة، و آخر فرحة أنا
أنا الغبينة
أنا عرف الياس
حشاك حشاك
عرف الوقيد مخلّف وسط الكيّاس
أنا نُص الباس .
أنا الضمار، أنا الخُنّار
أنا بالسرقة ، أنا جهار بهار
أنا خسارتك كنت تنجّم
سايرني كان إتنجّم
أنا الغلطة المطبعيّة في جياب الطبليّة
أنا اليتم ، أنا الفلوكة المفلوڨة ، أنا السما البحر أنا اليم
أنا النم ، كاس الهم
صغري تحش في سانية
صغري يرجع في ثانية
محلانا كنّا نلقطوا الهندي
نلفْقوا الطابونة ، في ناسنا إلّي ناكونا
حْليلي ، قدّاش بكّونا ...
أنا إلّي من غزرة نطيح
من ليل لليل نتفكّر قوايلنا نشيح
ما طلعناش كيفما حبّونا نكونوا
قصّينا للدنيا بونو
ناسنا حبّونا ، و قالوا: خلْصونا
في آخر الغناية نكرونا
أنا ولد الفكرونة ، في دنيا أخرى كنت نكون
ديناصور، دكتاتور، أكبر بطرونة
لكن ما يجيش
ولد ا لممحونة لازم يربّي الريش
يجيب الغشاشر
يعمّر دار ، مسطّر بالبركار
حكاية آفار
سيْبونا !
ما نحبّش نعيش، نحب نكون
مدڨدڨ، مشلّخ ، مفشّخ ،
من شوافري في الزّين معلّڨ
بريحة الصرّة الحَرّة مغلّف
متفكّر و نتلّف
بلاش دار ، منتّف و منفنف
على شنوّا حسدتونا ؟
من هاك العام خطاتنا الفرتونة
في حافة الخريف دزّيتونا
أنا ولد الحفا، ولد العما
ولد الكذا و كذا
أخطونا !
كلماتكم بلعونا ،
و ما قُلتونا .
بضمّة ، ڨتلتونا .
أحنا ولاد البكش ولاد الطرش ولاد العطش
ولاد السيستام ، بالتصريح
أحنا ولاد القيح .
أنا و إنتي و هي ، خَضْرا القضيّة
مرا
وليّة مرزيّة ، عزري يِكمي
الورد المنسي ، في دين والديّا
إبعد عليّا !
ما عندنا وين نوصلوا
كيف نخلطوا على سحابة
عملنا آفار
هذاكا حدنا
باعنا غدوة
مصْنا جَدنا
تولدنا في لَحْدنا
ماناش أحنا إلّي باش نكتبوا أكبر سمفونيّة
عطاتنا الڨمرة ، من أوّل رشفة
لتراب الثنيّة .
أحّيت عليك و عليّا
أبانا مبروك عاد فرحا مسرورا إلى البيت
و أحنا ضيّعتنا المسرحيّة .
أحيّت، قدّاش نحبّك و نخاف عليك
موش على بوسة خال البزّولة ،
على خاطر في الفجريّة ، عقاب سهريّة
كيف تقوم أمنا الغولة،
و تشطح فينا جبولة
تقشّرلي اللّوز و تصبلي في الكاس الأبجديّة .
شبي ربّك تواسي فيّا ،
لاباس
لاباس عليّا
إنتي فيّا
لاباس عليّا ، مادامها خَضْرا القضيّة .
