نكذب عليك

فين مشيت ؟

منين جيت ؟ 

طحت مالمطرة ، ولاّ منّي كيف بكيت ؟

يعلّيك على من يعانيك 

يسترك 

يهنّيك 

شبيك جيت ؟

خلّيني نزيد نحفى 

نبكي نبكي نبكي نبكي نضحك 

نعْمى

نعطي من ضهري ، لسنّيك لحمة 

نتعشّى بيك ...

يهديك !

مقطْع المحارم

نتكركب حلالم

سنين،

نشطح بين السلالم

زعمة تززّي الملزومة يديك ؟ 

عزاك !

حلّيت الشبّاك ، 

غسّالة النوادر 

كسرت من تصويرتهم الكادر 

تلطخت مع صوتك ، جيت حذاك 

كفْ و فَرْسة

سافرة هايمة هايشة بالكثرة كافرة

تعبد الواحل الأحد

تهرب معاه من الصرد 

سعدو إلّي في شون الخرّوب ، إتهد 

لقّى ليلو للرّشفة ، إتمد

مرحبا بيك 

مرحبا بيّا فيك 

وين نجيك ، نتخمد ؟ 

حلّيت القجر 

نلقى العصافر تتغنّى بيك

سبيتهم حْمُر 

وحروفك السّمرا

صبّيتهم جمر

سكّرت عليك البيت

شربت من الساس

لقيت برشة ناس

ما لقيتش زهر ، 

صبّيت في الكاس عينيّا .

في حروفك بدات 

و خفات السهريّة .

و كيف نقلّك آش جابك ليّا ؟ 

راني نكذب عليك .