بوخة ، أو بدايات من حرف الحِنّة

Nash Beeth Nash

il y a 15 heures, à proximité de Tunis

حب، قطوس خرب شدوه مرسكي بين زوز حيوط، عدوه تحليل.. 

دمو عشقة و خمرة قصايد. شدوه يغني: "يا هل ترى قداش من فرططو في الناعورة.. يا هل ترى قداش.. يا هل ترى قداش من فار مخبي في المقصورة.. يا هل ترى قداش.."

كلام الليل شطرو غايب، حروف المغنى مدهونة بالزبدة. شدوه يكتب عالحيوط، شطب على "فكرتنا الكل و بلا زعيم"، و خنتب في جرتها: "فكرة "للّا" هي الكل.. يا ڨمرة نحبك"... لوحوه في الباڨة و هزوه يبحث، "حرام يحب"... 

ضلام تحيس، النهج ضاق بين قهوة العنبة و دورة الشواشين. دبوزة بوخا شطرها معبي، حبقة مطلعة راسها من محبس حانوت علولو الحجام و راديون قديم يدندن عقاب الليل: زعمة النار تطفاشي..

Chut Libre و يصطادك في نهج مالانهجة قطّوس رماد يقلّك يا فرخ إتلم تجيه المشطة مع القلم تسيح العطرشية من بركونها دم ، إهفت ! العسكر بينا تلم و كنينك مقطوع مع الصرّة، مرّة . مرّة الحروف عالجرّة و كلامك الليلة محبتو حرّة ، حبها أشرب من خدها ضيّع صغرك في بحرها ، تكبر و تسافر و ترجع لبركونها تلقى فيه معلّق شونها يستنّاك.

Nash Beeth Nash زعمة تستنى؟ و يهدى القلب و يتهنى؟ و يطير الغراب و ترجعلي الأرض جنة؟ أنا نبيع كتابي و نشريلها الحنة، نعديها على يدها و ننقشلها حروف الغنّة... نحبها... زعمة ترجعلي؟ و كيف تغيب المطرة تسقيلي الورد بعلي؟

Chut Libre نقطة، رشلها على شعرها على زدرها على ريحة ريحتها من نارك نقطة، تسافر بيكم ريحة الحنّة، شوف أغزر الأرض تبعد تتفزّر و إنتي و هي لفوق، تحت الحنّة نقطة ، جنّة .

Nash Beeth Nash "أركح يا طفل لا يقولوا مهبول".. نركض و نجري عالبحور، كي حصان كبول، مضيع الصفايح و شادد قرون الغول، و نعيط باسمها في بلاد الروم و نرشق على سماها نجوم و نوار و غلة مالأربعة فصول...

Chut Libre صار هوّا إنتي ؟ عرضتني ميات سنا لقدّام بين عينيك رشمة، قالولي حكايتو طويلة فكةعليك مالخبّيلة صبّيت عليك الما، قدّاش داه كبير مرض الهوى يعطيه عزا. إستنّى نزيدك رشمة تحت الوذنين، نعرفك كل عشيّة ، راسك راس الفلوكة، دمعتك ساكبة كرشك مفروتة لحمتك مسلوخة

Nash Beeth Nash و الزممو العالق بالفلوكة؟ و ريحة التريلية في خيوط الغزل، و شمس الفول اللي قتلت "رقية" في قلب البحر، و الكيلو محبة اللي طيح عالرطل، و "لمياء القحبة" و قطاطش الشر، و كلاب المدينة اللي نهشوا عظمها و سكروا عليها الباب بألف قفل...

Chut Libre ليهم السفرجل و جبتك القمراية، غطّيهم ساعة ساعة و إيجا حذايا علاش ياكلك الوزف، قلبي عليك رهف ذكّرتني في غناية...
ما تمسحش ساقيك، أدخل بريحة الحنّة بين يديك، عقاب سهريتنا تجيك عشيرتك تعزّر فيك، و يتكسّر عرجون البسر ، تفيق غشاشر الجنون يفوح الخبر، و يتخبّى قطوس الرماد، ما يقدرشي عالمحبّة.

Nash Beeth Nash زعمة "تتعدّا القوايل و نعصروا القارص في عينين الصبر و نبراو.."؟ زعمة يدور الريح في الناعورة و ترجعلنا الخطيفة ولا نزيدوا نستناو؟ 
"صب! الكاس فرغ"
لف على جنابك، البرد يضرب في العظم. للا تستنى، و كلمة "نحبك" ما تفارق الفم. 
"صب! الكاس فرغ"...

Chut Libre كمّل معايا آخر رشفة، ميزال في كاسنا خبشة...

Nash Beeth Nash إجبد معايا آخر نفس، نرهنوا فقرنا و نسكرو بالفلس...

Chut Libre خوذ معايا آخر قعمورة، نبيعوا الرّيتسي و نتعشّاو الصرد

Nash Beeth Nash هزلها جوابي تلقاها في المقصورة، و كفّنّي بكلامها و قطرني بالورد..