تونس ليك ، تونس ليّا ، تونس حرّة حيّة

تونس ليك ، تونس ليّا ، تونس إلّي هي ، علاش تحبها موش ليه ، ليها ، ليّا ، علاش تحبها  ليك وحدك ؟   تونس ليك ، تونس ليّا ، ماكش كيفي ، وعمري ما نولي كيفك ،  موش على كيف سيدك ،ما تمضّيش على ضهري سيفك ،  على كيف الحرِّية ، موش على كيفي و موش على كيفك  ؛ خريفي خريفك ، علاش مالربيع إتدوّر وجهك ؟ علاش يسرقولك ضُحكك ؟ يعملولك مسرحية ، قلبك يدوان ، تنساه الألوان ، و إتدور عليّا ؟    

  علاش تحبني بالسيف نكرهك ؟ نتفرج في كلامك نبغضك  ؟ يا ترفسني يا نرفسك ، وتونس كبيرة ، وتونس ما رفعِتّك .   علاش تحب علّي موش كيفك تهز يدّك ؟ علاش تحب كيف ما بالسواد طفّيت نوار خدّك ، تعمل من دنيتنا لحدي ولحدك ؟ علاش ما تغزرش أبعد من فخذك ؟ 

تونس ليك ، تونس موش بلحيك ، تونس ما تمحيك ، حلِّتلك البيبان ، علاش تمحي فيا ، تنطَّقني من جواجية ، ننقم عليك ، ونقول عليك رهدان ، ياكلنا البهتان ، خلِّي الدرابو مطمان ، عيش بقدرك ، إلبس إلي يضهرلك ، إحترمني نحترمك ما نذلِّك ، خلِّيني في بلادي مطمان .

قلبك ، أسمع قلبك . قلمك ، إكتب بقلمك ، علاش تحب عالوصاية عليك وعليا  ، ربي ما حاجتو ببوسطاجية   !  عمركش ريت نوار يفتّح في الظلمة ؟   أخرج من هاك الغُمّة ، تونس تضحكلك ،سيب هاك الڨُمّة !  علاش مكمل في الضلام ، هازّتك الأوهام ، تصعّد في الكلام ، الإختلاف بالإعدام ، كل شي حرام ، و الكحولية  مالا أشنية ؟  أخطاك من هاك الثنية ! 

تونس ليك ، تونس ليّا ، تونس حرّة حيّة !