شْكون

شكون يعرف يوزن الكِلمة

 و شْكون؟

شْكون يعرف سوم الحِلْمة

و شْكون؟

شْكون تعلّم يصون الأمانة

ما يبيعش الحْنانة

و شْكون ؟

شكون يبنيلك دِنيا، في الظّلمةْ

و يبات في شون العَرجُون ؟ 

شْكون يخبِّي في شوافرو الخُطّيفة

و شكون على عِشقة ، على نَخْلة ، على رِحْلة

عْلى رجْفة خْفيفة

عْلى عيشة البهجة

و على زين اللّهجة

يدفع الطّريفة

و ما يْخُون ؟

شْكون ؟

شْكون تعلّم من عْرَق البحّارة

و شْكون ذاق حِنّة الأمارة

في جرحات البوڤرعون ؟

شْكون دْخل وحْدو للحْريقة

يلوّج على عْقاب حْقيقة

و خْرجْ موش مرْهون ؟

شْكون يستحق الثّيقة و شْكون ،

 كيف تقعد في حياتك دْقيقة

ما يْهون ؟

ليكُم غْناياتي

و أجْمل ضَحْكاتي

ليكُم نُوتاتي ، الغْبينة في سْكاتي

ليكُم فنّي و فْتاتي

و قولولي شْكُون ؟

الصّبر لشْكون ؟

المحبّة لَشْكون ؟

الدّمعة لَشْكون ؟

الشّمعة لشكون ؟

و النّفسْ؟ طالع هابط موزون

زعمة لَشْكون ؟

وحْدو الحُبْ،

بعْد الموقفْ

عند الحُرْ

يوفى بسُكونْ...

شكونْ

شكونْ لَشْكون ؟

مساهمة في نادي الأدب الشّعبي بالسليمانية‎

قلّي حِبها

قلّي حِبها تاو تبرا
حبّيتها
و حتّى من مطرة روحي خبّيتها
برات هيّا و مرضت أنا

قلّي إستنّاها ، أنسى بلاها
أخطبها من دمّك موش من إمّالاها
إستنّيتها
سرَحت شعباطة فوق حيطها
لبستها ، نسيت الدّنيا و فنيتها
كِبرت هيّا ، و صغُرت أنا .

قلّي ميسالش سامحها
رجعلها حقها مالبرد إلّي ذبحها
هِزْها ليك وحدك، إربحْها
هزّيتها و خلّيت الكل
رشمتلها عود القرنفل في الماضي إلّي ذبل
تصب الشتا ، هيّا تتدفّى و أنا نتبل
حيات هيّا، و جفلت أنا .

قلّي زيد أعطي كار للذل ، و عنّقها
ما تقساش عليها ، حتّى من غشّك منّعها
جيت عند ساقها و قريت على روحي الفاتحة
علّقت مفاتح الدّنيا عند سكّان الآخرة
تعشّيت الكلام و عطيتها اللّحمة الفاخرة
شبعت هيّا ، و جعت أنا .

قلّي، حِبها ، زيد حبها
حل قلبك كتاب و خلّيها تقرا
قتلو لوكان تقرا سطر ، تزيد تمرض
خلّيها بيّا كافرة ، خلّيني هايم نركض
هيّا إلّي تكتب موش أنا
و نعرف نصها لكلّو حْنانة
غير الوقت ، و الخطوة الخوّانة
و جياب الغول بضحكاتنا مليانة
هاني نحبْ فيها ، على جرحاتها نواسيها
على ترابها لسمرْ نوصّيك و نوصّيها
و إذا كيفي ، نهار عشيرتك تضيق بيك
تفكّر وصايتك ليّا ، و حِبها

ما تطفى نار للاّت الكل
و ما يسوى صوردي إلّي زْرع فيه الغل
نْحِبها و نسبها ندِزها على قدْ ما نْعِزها
و نرجع نحط عالفليجة قفِل
ندور ندور و نرجع نتكب مع ساسها ،
أنا سارق الڤمرة و أنا عسّاسها

قلّي حِبها باش تبرا ،
ما تغيب عليها حتّى بالنّظرة
خانتني العبرة و نسيت نقلّو :

نموتوا الكل ، باش تونس تحيا ؟

 

 

في السّقُوطِ الحُرْ

أيتّها السّيدات ، أيّها السّادة
أيّتها الثّورات ، أيّها الرُّكَاب

الرّجاء حجز التّذكرة
إِحْكام الأحزمة
إلتزام الأمكنة
إلْقاء الأمتِعة
نظم الصّفوف
إفراغ الرّفوف من الذّاكرة
قد جاءت القاطرة
فأصمُتوا
و أنصِتُوا
لكم تكلّمتُمْ
تحاوَرْتُمْ
تسابَبْتُم تقاذَفْتُم تكتّلتُمْ تقاتَلْتُمْ تغَزّلْتمْ تشاتمْتُمْ
تناَحرْتُم
تناسيْتُمْ
أن الجميع في نفس الطّائرة .

آن الأوان لتعرفوا حَدَّ الهُبوط
و لتدركوا حُكْمَ السُّقوط
ثمن الفاجًِعة الطّارئة

سيّداتي سادتي
العمر وقتَ السّقوط
ثانية ، لا أشرطة

لا وقْت تبقّى كي يقدِّم المسجِد أطعمة
و لا وقت كي يُهْدي المشفَى أغطية
لا وقت يكفي بعدُ كي يوزّع اللّوزُ أدعية
لا وقْتَ كيْ يفُكّ المهدِي أُحْجِية
قدْ لَفضَتْنا القارعة
و جمَّعنا حبُّ الطّريق
فلتصمتوا !
ولترقصوا !
و لتهرعوا
و لتفزعوا
قد قامت الحياة
و حان عُرْي المطر 

لن تكفي اللحظة الأخيرة
لنغيّر الأمكنة
و نزّوِقَ الأروِقَة
و نقتَسِم قهوةً مع الضّجرْ
فلتركعوا
أرانبا وحميرا
لصلاة الخطرْ
و تذوّقوا طعم القدَرْ
في ضحكاتِ الآلهة

سيّداتي سادتي
قد جاءت القاطرة

و فاتنا ركبُ البشرْ

*Peinture: Djamel TATAH

و الدّمعة بيضا

ما قعدلناش وطن غير بيت شعر

و ما قعدلناش نشيد غير وجه الشّمس

ما قعدلناش كرسي واحد لنهار التعب .

ما قعدتلنا فرتونة ، و لا قعدت ضحكة صحيحة

ما قعد فينا نفس ، و ما قعدت وردة بين يدينا ،

و لا فاتحة تحكي علينا .

ما قعدتلنا بلاد غير الحريقة

و ما قعدلنا ، خلاف كنّش الهم ، جواز سفر .

ما قعدلنا نجم ، يحاكم كسوف القمر .

ما قعد حد فينا يصدّق لا بدّ أن يستجيب القدر .

ما قعدلناش قجر يرفع الوجايع

و لا قعد قمح يكفي الجايع

ما قعد فينا عصفور راجع

و لا قعدلنا تمر .

ما قعدلناش وطن غير كوخ الشّاعر .

و لا قعد صيّاد ما تعبو سْفر .

ما قعدلناش عمُر ،

و قعدت القصيدة ،

قعدت نارنا لهيبة ،

و قعدت عالشّفرة شيبة .

كتبهم سودا ، و الدّمعة بيضا .

ما قعدلنا شي ، و قعد الكل .

ما قعدت سيوف الذل

و لا قعد ضبع 

يحفى الفالصو و يبلاح

و تقعد النّاس الملاح

بين الرواري ، فنها سلاح .

نمشيو الكل و تبقى الغبينة 

تزرع آخر درابو على وجوه الصباح .

ما قعدلنا شي

قعدوا الكل

و قمنا أحنا

نمشيو مع خطوات الغل .

إتغطّى

إلبس مليح و إتغطّى ،

ثورة و تتعدّى .

تاو نرجعوا صغار ، نصنعوا بالورق باطوات و نخافوا من غول الأبحار . ندوى و تتعدّى ، نكبة و تتعدّا و تتعدّا الفدّة و يعطينا شلوق جانفي نفس جديدة ، نرميو البلحوح المخنوق ، ينبت فينا البردڤان ،  نطلعوا فوق البرّيمة ، نقيموا فيها آذان من البريمة ، نحكيو لروبة السحاب قدّاش كرّهونا في غُدوة ، و نسينا إلّي عندنا زوز رواري ، تسكت وحدة ، تتكلّم في الثّانية عصافر الفرحة ، إتغطّى ، نهضة و تتعدّى !

إلبس مليح و إتغطّى ، آشبيك من كِلمة إتطيح ؟ إمشي لأبعد كرموسة ، شوفها لوكان من محبّتنا نهار تشيح . ريحْ ، و يتعدّا . قيحْ ، و يتعدّا . بحرنا ، و كشاكش سكاتو ، ساهل يتصفّى ، غير إتغطّى ! نهضة و تتعدّى . 

مزروب ؟ إتفضّل إتعدّا . نخلط عليك في أوّل صعدة ، نلقاك هاربة بيك فرسة و تصيح . قدّاش من ريح ميزالت بش تلعب بيك ؟ موش قتلك أصبر ، عمرو الفرخ على أمّو ما يكبر ، عاصفة و تتعدّا ، و ما عندك بخلاف الإمّيمة وين تتدفّى . إتغطّى ، و غطّي لحنينة يا يونس . سنين جاية تتهدّى ، و سنين بعدها تتعدّى ، يسألوك عالمخدّة و الوسّادة ، ولاّدة جيّابة ، تقلهم إسمها تونس .

إتغطّى ، خرافة و تتعدّى . 

جمهوريّة يدهم

ما تمشي مع الخطوة المضروبة

و ما تقول صاحبي ولد ربوبة

ما تسمع كلام إلّي مخبّيلك ذيوبة

و ما تعاشر غير إلّي يحُق ذاتك ، ما يبيع سرّك بذهوبة. 

في جمهوريّة يدهم

كيف الليل عليك يدهم

جامد ماكر أظلم

تقوم تأذّن عند راسك غسالة النوادر

تتوحّش ناسك ، و البرد يزدم 

تفركس على ذاتك تلقاها في يدهم

تستخايلهم يصونوك ، ما يبيعوا ضحكة الخز متاع خوك

يقوى الشلوق و كل يد تڤدم أختها

 يشد كل ذيب  عريشة

تقعد إنتي كيف الريشة

يتيم ذاتك ،

و تبات و تصبح فيك الحريقة نڤيشة.

رد بالك تخلّي ذاتك في يدهم ،

يوسقوها مع أوّل مطرة ، ينساو القلب إلّي ودهم

في الريّة اليمين يصبح هفهوف ، و لا يردهم

في الريّة اليسار ينبت القرنفل ، يطشّهم بالدم ، لا يفكهم !

ما تبيعش ذاتك بإسم الخيوة

و لا تبيعها بإسم العشرة ،

إهديها لأقرب صجرة ،

أزرعها في سكات الڤمرة 

إبنيلها بعزّك و دلالك جمهوريّة بلا رئيس

لا تلعب بيك الغشاشر طرح بيس

و إلّي حسبتوا دغباجي ، ما حسدتوا ، عنّقتوا و إنتي تلاجي ، يطلع إبليس

ناويلك من أوّل ما عطيتو يدّك ، عالنّحرة .

ما تمشي في خطواتهم ، إنتصر لذاتك 

ما تخلّي السردوك يتكلّم على لسانك ، إنتصر للنّبرة 

لا حماة إلاّ ذاتك ، و لا حمى إلاّ ذاتك

لا جيوش إلاّ ذاتك ، و لا كاس و آش هز يوزن العبرة .

في جمهوريّة يدهم ، 

اليد النظيفة تدخل بالفيزة و تتروفز

أخي لا تصافحني 

نخاف يدّي تجمد ، كي تقابل الدوانة

و أنا بلومتي في يدّي ، زعبانة حنينة و دفيانة 

لا تصافحني

جمهوريّة ذاتي ما تعرف خيانة

مغلّفة تمراتها بالفيانة 

ما عاش إلّي قال ما فمّا كان أنا

و عاش إلّي بعثها لكلها تترانا

و قال للخرشي : يدّك !

سلاحي فنّي،

و عقاب عمر . 

صاحبي قلم ، 

ما عمرو غدر . 

ليكم جمهوريّة يدكم في ... الجمر 

و يدّي ، هاي عندي تحفر للخيوبيّة قبر . 

إنتصر لذاتك ، و يدهم !   

على جونطة شوشطوك

25 , طاحوا الزروس و تكسرت السنّين، و بلاد الطُّرفة بلاد الضحكات باقي ساكنتلو بين العينين .

 
زعمة كيفاش لون الفجر في حبسك ، يا لحنين ؟ كيفاش طعم الوالدين ؟ تتفكّر كيف كنت وزف زعبان، داخل تبوس خارج تبوس ، بين حواجبك مضفورة حلمات الفرحانين ؟ 

 
25 ، يا غول تاكلني كل ما نزورك . في كل عيد نْبورك ، يسكر بين ضلوعي بوك يتغرس في الريّة الحيّة سيڤاروك. فكّولك المجرمة باكوك ؟ و قدّاش من ملاماتنا عليك بكّاووك ؟ على شعولك كرفطوك، بالندى ڤربطوك و شواوولك كبدة الإمّيمة في العيد . 

 
25 عمر الجمرات الأولى، على جونطة شوشطوك .

 .
محلا حجامتك و تاتوواجك، هاني ركبت في لوّاجك شربت قهوتك السّاردة ، و طلّيت على روحي فيك .

25 صُمعة نبليلك بالدّمعة و في شوارع الخسارة و الربح نأذّن عليك.

سألوني عليك صحابك إلّي نكروك ، و قالولي العزّارة ما حقّوش . زاد القضا بعد اللّوم حكالي عالغنجا إلّي على زين شفرتك الطايحة خطبتك من ستيلوك .

بو مصّة يا ببّوش ، تتذبح تصاورك المعلقة على أكتافي ، كل عيد ، مع الآذان لول ، قبل العلّوش.

عمري ما حكيتلهم عليك ، إنتي عرايا و ڤرايا، و أجمل ما في الحكاية إنتي ، نخاف نقلهم على كنيسيّة كفّك، يحسدوني عليك.
نخاف يسرقوك منّي ، تأمنّي ؟ نخاف كيف يسخفوا عليّا وعليك يخونوا الأمانة، غزراتك الشّامخة تضيع في فنّي، و تحبسك بعد حيوط الحبس، كلماتهم الزغيرة قدّام الحْنانة . 

الحبس كذّاب و الحي يروّح ؟ زعمة هاذي يقولها إلّي يزور مرّة تزفير الدم الصرصر بين سنّيك؟

بدلوك من البيت ؟ تفرّجت عالماتش ؟ تونس البارح كورت.. بيك.

نعرفك ڤوشي هايل ، تمركي بالمايل ، كسرتلك خطواتك الزّاكا إلّي عشقت أنفاسك ، تبلات بيك.
25 جبدة ، ماللّحمة ، تشوي الفحمة ، وينك يا رحمة ، في حبس الغشاشر ، حبس المبليّين ؟

ما توحّشّتكش يا الحزين ... توحّشت تراب ترابك ، ركشاتك بين أترابك، كرّاساتك إلّي خلّيتها في داركم وحدها تكتب عليك.

بدلوك من البيت ؟ تفرّجت عالماتش ؟ تونس البارح كورت.. بيك.

نعرفك ڤوشي هايل ، تمركي بالمايل ، كسرتلك خطواتك الزّاكا إلّي عشقت أنفاسك ، تبلات بيك.

25 جبدة ، ماللّحمة ، تشوي الفحمة ، وينك يا رحمة ، في حبس الغشاشر ، حبس المبليّين ؟

ما توحّستكش يا الحزين ... توحّشت تراب ترابك، ركشاتك بين أترابك، كرّاساتك إلّي خلّيتها في داركم وحدها تكتب عليك.

ما توحّشتكش ، ماعاد نتوحّش حد ، نستانس بزينهم ، يعاقبوني مدبيّة دينهم ، الشرك مع المولى حرام ، و أنا إذا بالجمرة توضّيت ، و من ليل لليل صلّيت ، راهو لل 25 فاتحة في عينيك.

لبّيك يا حبسهم لبيّك !

تونس، هآا تونس ، يآآآآآا تونس حنًّا، و ليداتك هاذوكم ، تخنفوا زادوا في الشعول، و طافوا بيك. سيّب فرخ الكانالو، اليوم دوّر ڤارو ، نكتو بالومية، أمنا الغولة عملت بيه كمية، غدوة في سراحو يدور عليك .

عيب؟ عيب عليه ولاّ علينا ولاّ عليك؟

تي سيّب، سيّب، سيّب ، سيّب العيب ، سيّب اللّفعة ، سيّب اللسعة ، سيّب اللعبة .



سيّب حليب سنّيك
غدوة يفديك .