ما تمشي مع الخطوة المضروبة
و ما تقول صاحبي ولد ربوبة
ما تسمع كلام إلّي مخبّيلك ذيوبة
و ما تعاشر غير إلّي يحُق ذاتك ، ما يبيع سرّك بذهوبة.
في جمهوريّة يدهم
كيف الليل عليك يدهم
جامد ماكر أظلم
تقوم تأذّن عند راسك غسالة النوادر
تتوحّش ناسك ، و البرد يزدم
تفركس على ذاتك تلقاها في يدهم
تستخايلهم يصونوك ، ما يبيعوا ضحكة الخز متاع خوك
يقوى الشلوق و كل يد تڤدم أختها
يشد كل ذيب عريشة
تقعد إنتي كيف الريشة
يتيم ذاتك ،
و تبات و تصبح فيك الحريقة نڤيشة.
رد بالك تخلّي ذاتك في يدهم ،
يوسقوها مع أوّل مطرة ، ينساو القلب إلّي ودهم
في الريّة اليمين يصبح هفهوف ، و لا يردهم
في الريّة اليسار ينبت القرنفل ، يطشّهم بالدم ، لا يفكهم !
ما تبيعش ذاتك بإسم الخيوة
و لا تبيعها بإسم العشرة ،
إهديها لأقرب صجرة ،
أزرعها في سكات الڤمرة
إبنيلها بعزّك و دلالك جمهوريّة بلا رئيس
لا تلعب بيك الغشاشر طرح بيس
و إلّي حسبتوا دغباجي ، ما حسدتوا ، عنّقتوا و إنتي تلاجي ، يطلع إبليس
ناويلك من أوّل ما عطيتو يدّك ، عالنّحرة .
ما تمشي في خطواتهم ، إنتصر لذاتك
ما تخلّي السردوك يتكلّم على لسانك ، إنتصر للنّبرة
لا حماة إلاّ ذاتك ، و لا حمى إلاّ ذاتك
لا جيوش إلاّ ذاتك ، و لا كاس و آش هز يوزن العبرة .
في جمهوريّة يدهم ،
اليد النظيفة تدخل بالفيزة و تتروفز
أخي لا تصافحني
نخاف يدّي تجمد ، كي تقابل الدوانة
و أنا بلومتي في يدّي ، زعبانة حنينة و دفيانة
لا تصافحني
جمهوريّة ذاتي ما تعرف خيانة
مغلّفة تمراتها بالفيانة
ما عاش إلّي قال ما فمّا كان أنا
و عاش إلّي بعثها لكلها تترانا
و قال للخرشي : يدّك !
سلاحي فنّي،
و عقاب عمر .
صاحبي قلم ،
ما عمرو غدر .
ليكم جمهوريّة يدكم في ... الجمر
و يدّي ، هاي عندي تحفر للخيوبيّة قبر .
إنتصر لذاتك ، و يدهم !
