بالسلامة يا ماتر !

غاروا مِنِّكْ يا ماتر

غاروا من كلماتك

من سناجق العسكر على أكتافك

يِتْتَكّى القرنفل يا ماتر

يعزِّينا فيك

قد ما حبوك يا ماتر ، شوية فيك

حبيناك شوية

هذيكا غلطتنا يا ماتر ،

ما نعرفوش نحبوا

هذيكا القضية

رصاصتهم يا ماتر ،

حقها عليا

 وبنتك يا ماتر

بنتي ،

نكذب ،

حد ما يملى  أجياب الطبلية ،

وفي العيد يا بلعيد

بلاصتك الفارغة جمهورية

وفي المولد يا ماتر ،

سوريتك تبات وتصبح مطوية

في الكتاب يا ماتر ،

ضحتك يقريوها لغشاشر الثنية  .

يكبر النوار ، وتنجح الصبية

وتخمد القايلة يا ماتر

والرمان يحل فينا فترية

وينك باش تاكل معانا شوية ؟

يعطيها عزا الحرية

كي تبات بلاش بيك وبيه وبيا

الماتر ماتر

والقلب السافر ، عريان للقضية

هْدا  أيّاماتو للرصاصة ،خاينة فاجرة مِكرِيّة

ما خلات فينا بلاصة

نحبِّك يا ماتر ، سامحني بطيت شوية 

بالسلامة ، بالسلامة وإنت مسافر

صبِّت وراك تونس الماء ،

تستنى في القرنفل

  لعنتهم ملايكة السما

قالولها شكري بلعيد  تقتل

بكاتنا الشتا

 و حماة الحمى تبل

يتولاّهم أول آذان وآخر آذان

تتولاّهم منسيات القرآن

يتولاّهم عزاء البردڨان

تتولاّهم شرعية اليتامى 

سامية حُرّية

نتطلفح عقلتني ريحة .

سامية

العينينن هوما و مش هوما  ، لثنين . الموجة متبدلة ، عالرقبة داير كشكول أخضر حنين ، ولّا زعمة لون العينين ؟ جريت . 

ترمات من وراء الدكانة ، العالم إستدعى روحو حذانا ، هزنا السكات في تعنيقة خذانا .  ما فما كان الدمعة تهبط عريانة ؟ 

- سامية ، حانوتك ؟     خذيت تصريح من البلدية ؟ سامية ماعادش ؟ آش ولّيت ؟ ولّيت ؟  وقتاش ؟ وين ومع شكون جيت ؟

- إيجا للدار حذاية اليوم ، نسكّر  العشية . تتصور أنا ، وليت نخاف من الزبراطة والسوكارجية ؟

ضحكنا بالشهقة ، و صبّرنا رواحنا بالدرقة حتى جات العشية .

20h00 :  وفات دبّوزة  .

21h00 : الثانية في نصف الثنية ، قامت سامية قتلي يا خايب عندي ليك هدية ، عندها مدة مخُبِّية ، يا مدكاك ، ما تضحكش عليا  !

رجعت سامية بشكارة معبية بالحلوى ، ألوان ألوان .   وفيت أنا قبل  الدبّوزة الثانية .

- كل كعبة حلوى ، نقول السرفور جابها كان ليا . كل نهار وقسمو ، عرفتهم الكل . إلي قهوتو شهوتو وإلي شهوتو تمثيلية ، إلي يهتري برشة يقطع رحلهم  و إلي عينيه ما يحطهمش فيا ، حاشم بروحو ، وإلا بيا ...   المهم ، قطعت هاك البلاصة المرزية ، عامين يا نسّاي ، وقعدت ديمة نستناهم في قهوة التياترو ، تعرف أنا كنت ديمة نحلم نكون فنّانة؟ ... حاسيلو ،    لمّيت الحلوى وولّيت نبيع في الجرايد و الدخان  ، شريتها بالألوان هاذية ، الحُرّية .    فهمت توّيكة تصريح البلدية ؟

 إنت الفن سامية . كتمتها وهزيت خطواتي نسب في سرفور القهوة علاش ما قاللهاش إيه الحلوى هاذي ليك انتي وحدك ، و موش لتراب الثنية ؟

22h00 : يا حَنّة، ما أغلى سومك يا رجولية !

وأنا مروّح ، و رقبتي بكشكول سامية الأخضر مستكفيّة   ، عرضتني روحي ، سِخفت عليا .

من غدوة عالصباح :

- سامية ، عندك جريدة تحكي اليوم عليك وعليا ؟

مدّتلي بريكيّة

  

تجارة و صنب

شتا

والعصافر تصب

هاو قالوا الرسول تسب

زعمة  عملها الكلب أبو لهب ؟

أخطاك يا بوهالي

 تجارة و صنب 

صيف

ويبكينا الخريف

كوارجي خفيف نظيف 

نصب النصبة

ودنا بالعصبة

  

وهرب

كراسي وعتب  

جاك الأبابيل يا بومنديل

أضحك  made in china 

مالبيضة شد حفينة

وهيا بنا ننتخب 

أخطاك يا سطمبالي

 تجارة و صب العنب

ربيع 

وياسمين يرضع 

حمالة الحطب ما أحلاها كيف تركع 

من صغرك زيد ادفع

الملح زيد أبلع

وقول ما قلي حد

اخطاك يا زوالي

سياسة وصنب ! 

وقتاش تحرق الصنبة يا دين إزب ؟؟؟

وَأَقِيمُوا الصَّلَاةَ وَآتُوا الزَّكَاةَ

البغدادي قُتل يوم أُحرِقت كتب أطفاله فوق رفوفها . البغدادي أعدم يوم إنشق كبد السماء لا كبده .  البغدادي رحل يوم نُهِبت سومر من رائحة القهوة . البغدادي نُحر ساعة إغتُصِبت بغداد في عينه اليمنى لتسكن عينه اليسرى ساعة المآذن. . البغدادي راح يوم أغرقت دمعة الزياتين ليلنا ونحن بقينا. البغدادي مات منذ خيبات ، منذ عرس يرثينا . 

وَأَقِيمُوا الصَّلَاةَ وَآتُوا الزَّكَاةَ وإلخ .... كلنا بغدادي من يوم طردتنا القصيدة . 

سامحني تونس ،

 ما عادش عندي بلومة قد الوجيعة.

قلنا السلام

و نسيتوا الضو ..  كالخفافيش تموتوا عالظلام

حطيتوا الكشطة .. ومن السبحة صنعتوا لجام

وعشقتوا العورة  .. في السر و في الجهر قلتوا حرام 

 و سرقتوا الثورة ..لأولادنا، وفي ترابنا سميتونا أيتام

خرجتوا من الحفرة .. و البارح كنتوا في منام

وقلتوا علينا مرضى  ، وفرخ الحجلة تحبوه غلام

  مالباب غدرتوا .. و عالصمعة شنقتوا الأعلام

تقتلوا إلي يتكلم  .. نموتوا جماعة و  يقعد الكلام

مزيانين نموتوا ، ياجاهل قلنا السلام  !

أنا موش مئز

أنا موش مئز : عطّار الحومة كان يحط فيروز كيف يحل الحوينتة ولا ما يحط شي ومعلق ڨرينطة ، حلوة الفليّو ضربها الخز .

أنا موش مئز :  وقت إلي العريان على خاطر النيف تعفس وتسب ،و الحبار ميزال ما شاحش يخنتب في الكلمة ،الفار تخبى وهرب ، واليوم خرج من الغار وضرب . زمان غرايب ، زمان عجب . 

أنا موش مئز : إلي ودنا برصاصة ،و ما لقاوه في حتى بلاصة ، وإلي كذبو ألوان وبصحافة الفصاصة علّى الفيلا والبرطمان ، في تونس اليوم عايش مطمان ، هوما الملايكة وأنا الشيطان .

أنا شيطان موش مئز : ثورة كرامة وخدم ، ولا ثورة بزازل و ترم ؟ ولا واحد فينا حشم : شبعنا مهازل ، يا شعبي المنيك إتلم ! نسبك ونزيد نسبك ، نڨدمك ودمي أنا يسيح  ، إلي حس روحو تلاويح ولعبت به الريح ، حرق روحو عن إختيار  ولاّ زعمة لزز؟ 

أنا مووووش مئز :  تحرير تكفير تخدير تجوبير تجودير تكلفير تعنطير تبندير تڨصدير تكبييييييييييير!  تغيير ؟ و الفار نسى ماضيه، أنا الشيطان وهو الملايكة ، ناوي عالحرير كيف دودة القز  .

أنا موش مئز : سكروا البورديل ومدوا الذيل ، يبطرنوا  عالبلاد يستبلهوا في العباد .  ما فماش إمسخ ما زارش وشعّل شمعة ،  هازتكم اللهفة و الطمعة  وأحنا ساكنتنا الدمعة ، لوكان نخليك تتعدى نبنيلك صمعة : لا رحم من يسرق وينهب ، يكذب ويبلفط يحب التاريخ علتغير الجديد يكتب ،   وناوي يكمل هو زادة الحلمة ينهب .  يتسكبن يتلون ، على بلادو يبطرن ويصلي بالحاضر الجمعة ! 

أنا شيطان موش مئز :  هذي ثورتنا  موش ثورة نقاب ، هذي ثورة  الجواعة والحفاية ، ثورة الامهات العازبات و القحاب ، يا وجه الغراب إنت القحبة ، تفلّم بسبحة ، سكّر هاك الجلغة ، تجي تقول صحة تقول سداف ،  طامع في خلافة وناس تبات عالفتفات ، إسأل إلي خان قبلك و  اتعلم ملي فات : الجربوع يجيه نهار و يطربق عليه المنداف ! 

 أحرق أضرب أقتل أذبح أشنق بالكابل : أنا الموش مئز وإنت ... إنت الموش راجل.