5 avr. 2014

شْكون

شكون يعرف يوزن الكِلمة
 و شْكون؟
شْكون يعرف سوم الحِلْمة
و شْكون؟
شْكون تعلّم يصون الأمانة
ما يبيعش الحْنانة
و شْكون ؟

شكون يبنيلك دِنيا، في الظّلمةْ
و يبات في شون العَرجُون ؟ 

شْكون يخبِّي في شوافرو الخُطّيفة
و شكون على عِشقة ، على نَخْلة ، على رِحْلة
عْلى رجْفة خْفيفة
عْلى عيشة البهجة
و على زين اللّهجة
يدفع الطّريفة
و ما يْخُون ؟
شْكون ؟

شْكون تعلّم من عْرَق البحّارة
و شْكون ذاق حِنّة الأمارة
في جرحات البوڤرعون ؟

شْكون دْخل وحْدو للحْريقة
يلوّج على عْقاب حْقيقة
و خْرجْ موش مرْهون ؟
شْكون يستحق الثّيقة و شْكون ،
 كيف تقعد في حياتك دْقيقة
ما يْهون ؟

ليكُم غْناياتي
و أجْمل ضَحْكاتي
ليكُم نُوتاتي ، الغْبينة في سْكاتي
ليكُم فنّي و فْتاتي
و قولولي شْكُون ؟
الصّبر لشْكون ؟
المحبّة لَشْكون ؟
الدّمعة لَشْكون ؟
الشّمعة لشكون ؟
و النّفسْ؟ طالع هابط موزون
زعمة لَشْكون ؟

وحْدو الحُبْ،
بعْد الموقفْ
عند الحُرْ
يوفى بسُكونْ...

شكونْ
شكونْ لَشْكون ؟

مساهمة في نادي الأدب الشّعبي بالسليمانية‎


7 commentaires:

  1. دوب ما كمّلت قراية تدوينتك حسّيت برغبة باش نسمع " تتفتّح لشكون يا زهر الليمون " شكرا على لحظات المتعة الخالصة.

    RépondreSupprimer
  2. وشكون وشكوووووووون وشكووووووون ؟؟ إإإإإإإإإإإإإإإإإإيه واش خص جينا نعرفو للشكون يا شوت

    RépondreSupprimer
  3. https://www.youtube.com/watch?v=23Sz36hrNqs

    RépondreSupprimer

3abbar, w YED'Hom !